ПАРЫЖ. Міністар фінансаў Францыі Эрвэ Гэймар гаворыць, што Парыскі клюб крэдытораў пагадзіўся замарозіць выплату пазыкаў краінамі, якія пацярпелі ад цунамі. Міністар сказаў у нядзелю францускаму радыё, што ягоны ўрад папярэдне дамовіўся пра гэта зь іншымі ўдзельнікамі Парыскага клюбу. Падрабязнасьцяў ён не паведаміў. Вядома, што ў сераду ў Парыжы адбудзецца сустрэча Клюбу крэдытораў на ўзроўні міністраў. Раней стала вядома, што краіны Вялікай сямёркі пагадзіліся на мараторый адносна пазыкаў пацярпелых ад цунамі краінаў. Усе краіны Вялікай сямёркі ўдзельнічаюць у Парыскім клюбе крэдытораў, у якім 19 удзельнікаў.