Лінкі ўнівэрсальнага доступу

Старшыня акруговай выбарчай камісіі вынесла папярэджаньне Міколе Статкевічу


Альгерд Невяроўскі, Менск Каліноўская акруговая выбарчая камісія №108 г. Менска вынесла афіцыйнае папярэджаньне кандыдату ў дэпутаты Палаты прадстаўнікоў Міколе Статкевічу. Лідэра сацыял-дэмакратычнай партыі Народная грамада прызналі вінаватым у распаўсюдзе ўлётак без выходных дадзеных і ў кампрамэтуючых выказваньнях на адрас улады, якія нібыта рабілі спадар Статкевіч і ягоная давераная асоба Ўладзімер Парфяновіч.

Старшыня акруговай выбарчай камісіі Марыя Бацян на паседжаньні 9 кастрычніка зачытала некалькі заяваў выбарцаў. Гэтыя людзі сьцьвярджаюць, што Мікола Статкевіч нібыта парушыў правілы агітацыйнай кампаніі:

“У сваіх улётках (частка якіх ня мела выходных дадзеных) кандыдат Статкевіч некарэктна й груба выказваўся пра кіраўніцтва Беларусі й яе дзяржаўны лад. У інтэрвію, зьмешчаным у незарэгістраванай газэце “Зубр”, Мікола Статкевіч гаворыць, што зробіць усё, каб “не дапусьціць фальсыфікацыі выбараў і спыніць чалавека, які імкнецца да бязьмежнай улады”.

Старшыня камісіі таксама цытавала вытрымкі з выказваньняў Статкевіча ды іншых апазыцыйных лідэраў у газэце “Неделя”, называла іх антыдзяржаўнымі і кампрамэтуючымі ўлады. Некаторыя сябры камісіі лічаць сябе абражанымі й выказваньнямі даверанай асобы Міколы Статкевіча Ўладзімера Парфяновіча, які на адной сустрэчы з выбарцамі сказаў, што выбары будуць сфальсыфікаваныя.

Мікола Статкевіч заявіў, што заканадаўства не парушаў, назваў улёткі без выходных дадзеных правакацыяй і папрасіў паказаць яму, якія законы забараняюць агітаваць супраць пытаньня вынесенага на рэфэрэндум. Але яго ўжо ня слухалі. Старшыня камісіі сказала:

(Бацян: ) “Для пачатку мы Мікалая Віктаравіча Статкевіча, кандыдата ў дэпутаты, папярэджваем аб парушэньні Выбарчага кодэксу. Усё”.

Мікола Статкевіч так пракамэнтаваў гэтае рашэньне акруговай камісіі:

(Статкевіч: ) “Я думаю, што гэта рэакцыя страха й імкненьня зьняць мяне з выбараў, таму што кампанія мая разгортваецца, і я ўпэўнены, што тут, на гэтай выбарчай акрузе, людзі прагаласуюць па рэфэрэндуму супраць унясеньня зьменаў у Канстытуцыю, і прыйдзецца ісьці на вельмі жорсткія, моцныя фальсыфікацыі”.

Нягледзячы на папярэджаньне, Мікола Статкевіч не зьбіраецца спыняць антырэфэрэндумнай агітацыйнай кампаніі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG