Лінкі ўнівэрсальнага доступу

Выпадак зь фірмай “Міндаўг”: “Клясычны прыклад працы дзяржаўнай машыны супраць аднаго зь лепшых прадпрыемстваў краіны”


Ігар Карней, Менск Сканфіскаваныя рашэньнем Вышэйшага гаспадарчага суду ў сталічнай фірмы “Міндаўг” дзьве сотні мікрааўтобусаў “Мэрсэдэс-Спрынтэр”, якія працавалі ў якасьці маршрутных таксовак, неўзабаве зноў могуць зьявіцца на вуліцах Менску. Дзяржаўнае прадпрыемства “Мінсктранс” фактычна завяршыла перамовы зь нямецкай карпарацыяй “Даймлер-Крайслер” на закуп мікрааўтобусаў, якія вось ужо два месяцы знаходзяцца на складзе часовага захоўваньня.

Нагадаю перадгісторыю гэтага аўтамабільнага скандалу: якраз два месяцы таму 200 мікрааўтобусаў было канфіскавана паводле пазову кампаніі “Даймлер-Крайслер”. У кулюарах казалі, што “Міндаўг” парушыў дамоўленасьці на выкарыстаньне машынаў – маўляў, замест грузавых перавозак аўтобусы прыстасавалі пад перавозку пасажыраў, а таксама быццам беларусы наогул адмаўляліся выплочваць крэдыт. Як бы ні было, беспрэцэдэнтная партыя тэхнікі была транспартаваная на склады часовага захоўваньня.

Сытуацыю пасьпяшаліся выкарыстаць многія суб’екты гаспадараньня. Цягам жніўня-верасьня некалькі аўтапрадпрыемстваў спрабавалі перакупіць арыштаваныя аўтобусы. З улікам моцнага лобі Менгарвыканкаму гэта, здаецца, удалося зрабіць падначаленаму гораду прадпрыемству “Мінсктранс”. Прынамсі, у гандлёвым доме “Энэргія”, які прадстаўляе ў Беларусі інтарэсы карпарацыі “Даймлер-Крайсьлер”, пацьвердзілі: перамовы фактычна завершаныя. Супрацоўнік “Энэргіі” выказаўся, што пытаньне вырашаць усё адно трэба, бо машыны два месяцы стаяць бяз руху. А вось на якіх умовах – камэрцыйная таямніца.

(Прадстаўнік “Энэргіі”: ) “Пра кошт я б вам не сказаў, калі б нават і ведаў. Бо, як вы разумееце, гэта камэрцыйная таямніца двух прадпрыемстваў, якія падпісваюць паміж сабой дамову. Таму – прабачце. Да таго ж, зьдзелка адбываецца наўпрост паміж “Даймлер-Крайсьлер” і прадпремыствам “Мінсктранс”, таму падрабязнасьці нам невядомыя”.

А што з нагоды зьдзелкі кажуць ў фірме “Міндаўг”? Ці пакідала ўвогуле кіраўніцтва спадзяваньні на вяртаньне аўтобусаў?

На жаль, ужо два месяцы кіраўнік фірмы “Міндаўг” Аляксандар Трухановіч на кантакт з журналістамі ня йдзе, не дазваляючы гэта рабіць і сваім падначаленым. Як кажуць (і гэта можна зразумець), у спадара Трухановіча стрэсавы стан: ад такога ўдару ягоны бізнэс адыдзе ня хутка.

Затое аднадумцы Трухановіча не хаваюць абурэньня рашэньнем Вышэйшага гаспадарчага суду. Старшыня менскага Саюзу прадпрымальнікаў Уладзімер Карагін сьцьвярджае, што дзяржава сама ж і не дазваляла рабіць лізінгавыя адлічэньні, штучна абклаўшы прадпрыемства штрафнымі санкцыямі.

Паводле Карагіна, да “Міндаўга” склалася перадузятае стаўленьне на падставе розначытаньняў законаў. У момант узьнікненьня канфлікту адно з палажэньняў аб ліцэнзаваньні аўтаперавозак можна было трактаваць па-рознаму. Аднак нягнуткасьць беларускага заканадаўства, якое скіраванае выключна ў рэпрэсіўнае рэчышча, аўтаматычна перавяло фірму у шэраг парушальнікаў закону. “Міндаўгу” пасьля гэтага дазволілі выплочваць толькі накладзеныя фінансавыя санкцыі – было спагнана болей за мільён даляраў. А паколькі быў арыштаваны рахунак і ўсё здымалася на штрафы, лізінгавыя адлічэньні не адбываліся.

“Клясычны прыклад некарэктнай працы дзяржаўнай машыны супраць аднаго зь лепшых прадпрыемстваў краіны”, канстатаваў у размове спадар Карагін. Затое іншыя здолеюць гэта выкарыстаць для сябе з выгодай, – рэзюмуе Уладзімер Карагін.

(Карагін: ) “Натуральна, што цяпер аўтобусы купяць па астаткавым кошце. Але ўся тэхніка ў вельмі добрым стане, бо “Міндаўг” – гэта яшчэ было і сэрвіснае абслугоўваньне, свая база сур’ёзная. Але ж самае дарагое – гэта не машыны, а напрацаваныя фірмай маршруты. Тая доля рынку, які яна займае, робіцца вялікімі намаганьнямі. Той жа “Міндаўг” зьмяніў тры пакаленьні машынаў: адразу патрыманыя карэйскія міні-аўтобусы, расейскія “Газэлі”, потым “Форды”, і гэта ішоў ужо чацьвёрты этап”.

Шараговым карыстальнікам паслугамі маршрутных таксовак, якія не нашмат даражэйшыя за звычайны аўтобус, збольшага, усё роўна, пад якой шыльдай выходзяць на маршрут перавозчыкі. А таму нюансы закуліснага падзелу маёмасьці, як вынік, застаюцца ўнутранай справай суб’ектаў гаспадараньня. Нават калі можна казаць пра элемэнты не зусім сумленнай гульні.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG