ГАЗА. У паласе Газа сёньня прынамсі трое палестынцаў загінулі, а яшчэ некалькі былі параненыя ў выніку ракетнага ўдару ізраільскага гэлікоптэра.
Камандаваньне войска Ізраілю кажа, што ўдар быў нанесены па групе экстрэмістаў ў лягэры Джабалія.
Дарадца ізраільскага прэм’ера Арыеля Шарона Дор Голд заявіў:
(Голд) “Палестынскія ўлады не выконваюць сваіх абавязкаў што да падтрымкі парадку і забесьпячэньня міру. таму Ізраіль будзе рабіць усе неабходныя захады, каб не дапусьціць да ракетных абстрэлаў сваёй тэрыторыі”
Цягам апошніх трох дзён, у выніку апэрацыі ізраільскага войска загінулі больш за 40 палестынцаў. Між тым ізраільскія танкі і аддзелы жаўнераў надалей канцэнтруюцца ў паўночнай частцы паласы Газа.
Прадстаўнік палестынскага прэзыдэнта Ясіра Арафата зганіў сёньня захады ізраільцаў ды заклікаў міжнародную супольнасьць умяшацца.