Лінкі ўнівэрсальнага доступу

Улады ціснуць на кандыдатаў-прадпрымальнікаў усімі магчымымі сродкамі


Міхал Стэльмак, Менск Сярод зарэгістраваных кандыдатаў у дэпутаты Палаты прадстаўнікоў – шэраг прадстаўнікоў дробнага бізнэсу. Як праходзіць іх выбарчая кампанія?

Найперш, хацелася б нагадаць афіцыйную пазыцыю ўладаў у дачыненьні да намеру прадстаўнікоў дробнага бізнэсу балятавацца ў Палату прадстаўнікоў. Яшчэ вясною ў штогадовым звароце да парлямэнту гэтую пазыцыю сфармуляваў Аляксандр Лукашэнка. Ён зазначыў, што ў Палаце прадстаўнікоў павінны быць “усе слаі насельніцтва, апроч бізнэсоўцаў, камэрсантаў, капіталістаў”.

З гэтага вынікае, што тых жа дробных бізнэсоўцаў у складзе новага парляманту ўлады не хацелі б бачыць. Напрыклад, у Лепельскай выбарчай акрузе №23 балятуецца адзін з найбліжэйшых паплечнікаў Лукашэнкі Раман Унучка. Ягоны канкурэнт – Алег Тычына, які ёсьць сябрам грамадзкага аб’яднаньня дробных прадпрымальнікаў “Пэрспэктыва”. Вось што спадар Тычына распавёў мне пра адметнасьці выбарчай кампаніі ў гэтай акрузе:

(Тычына: ) “Перашкаджаюць мне праводзіць сустрэчы з выбарцамі. У нядзелю 100 чалавек – прадпрымальнікі і наведнікі рынку – патрабавалі сустрэчы са мной, але яе не дазволілі. Учора закрылі ліцэнзію на права гандлю прадпрымальніку Маляўку Аляксандру Мікалаевічу, які ёсьць маёй даверанай асобай. Лепельскія ўлады цалкам агітуюць за Унучку”.

(Карэспандэнт: ) “У чым выяўляецца гэтая агітацыя на карысьць спадара Ўнучкі?”

(Тычына: ) “Вось выйшаў нумар №78 газэты “Лепельскі край”. Усё пра Ўнучку. Маўляў, Унучка нам зараз дапамагае, а калі стане сьпікерам парлямэнту – наагул закідае грашыма”.

У іншых акругах ціск адчуваюць усе кандыдаты ў дэпутаты зь ліку прадпрымальнікаў, зь якімі я меў гутарку. Напрыклад, Леанід Невар з Рэчыцы, які балятуецца ў выбарчай акрузе №46, меркаваў пабудаваць у гэтым райцэнтры гандлёвую краму. Аднак, паводле спадара Невара, як толькі ён абвясьціў, што хоча стаць парлямэнтаром, дык будаўніцтва давялося адкласьці:

(Невар: ) “Склікалі сход, напісалі заяву, што там ня крама ім патрэбна, а дзіцячая спартовая пляцоўка. Хаця яна ёсьць побач, у пяці кроках. Мы выдаткавалі на гэта вялікія грошы – іх не вяртаюць і ня даюць іншага месца. Хаця ёсьць рашэньне райвыканкаму пра выдзяленьне”.

(Карэспандэнт: ) “Вы зьвязваеце гэта з вашай палітычнай дзейнасьцю?”

(Невар: ) “Так. Толькі з палітычнай дзейнасьцю. Таму што мясцовая ўлада вырабляе ў Рэчыцы, што толькі ўздумаецца. Яна імкнецца спыніць мяне ўсімі шляхамі”.

А вось якія падзеі, зьвязаныя з бізнэсам кандыдата ў дэпутаты, разгортваюцца ў Узьдзе, у выбарчай акрузе №92, дзе балятуецца сябра Беларускай сацыял-дэмакратычнай партыі (Народная грамада) Віктар Крываль:

(Крываль: ) “Я прадпрымальнік, і давялося закрыць сваю лаўку, яна называецца “Мясная лаўка”. Таму што ўлады рэзалі-рэзалі, а зараз паставілі кропку. Ня здолелі зрабіць гэта праз санітарную і падатковую службы – дык яны што зрабілі? Забаранілі людзям выдаваць даведкі, каб мне паставіць кляйно на мясе. Прадстаўнікі раённай вэтстанцыі кажуць, што ўсё, паступіла каманда з раёну ад старшыні райвыканкаму, што калі вы яшчэ хоць адну такую тушу “пракляйміце”, то шукайце іншае месца працы”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG