Юлія Несьцярэнка ў гэтым сэзоне ўжо на старт ня выйдзе

“Пэрыяд фізычнага аднаўленьня ў мяне зацягнуўся і, паводле рэкамэндацыяў спэцыялістаў, я ня буду больш стартаваць у гэтым сэзоне”, заявіла 13 верасьня ў галоўным берасьцейскім філіяле “Прыёрбанку” алімпійская чэмпіёнка ў бегу на 100 мэтраў падчас урачыстага ўручэньня ёй карткі “Visa Gold”. Спадар Джэфры Малікан, выканаўчы дырэктар банкаўскай групы “Райфайзэн Аўстрыя”, у якую ўваходзіць і беларускі “Прыёрбанк”, сказаў, што ён ганарыцца тым, што Юлія Несьцярэнка абрала менавіта іхны банк.