Лінкі ўнівэрсальнага доступу

У недзяржаўных страхавых кампаніяў аднялі “зялёную карту”


Ігар Карней, Менск Ад сёньняшняга дня беларускія аўтаўладальнікі змогуць выяжджаць па-за межы краіны толькі з полісам міжнароднай сыстэмы страхаваньня "зялёная карта", набытым у дзяржаўных страхавых кампаніях. Паводле Ўказу Аляксандра Лукашэнкі, менавіта дзяржаўныя кампаніі фактычна сталі манапалістамі ў страхаваньні грамадзянскай адказнасьці аўтатранспарту.

У дзейнасьці страхавых кампаній страхаваньне аўтатранспарту займае 70%. Але ад 1 жніўня недзяржаўныя фірмы пазбаўляюцца права наагул страхаваць аўтамабілі. А сёньня ў іх аднялі ліцэнзіі на афармленьне полісаў “зялёная карта”, абавязковых у часе выезду за мяжу. У выніку з рынку выціснуты такія буйныя кампаніі, як “Белзьнешстрах”, “Альвэна”, “Беліндзяржстрах”, “Багач”, “Купава”, “Слаўполіс”, бальшыня зь якіх маюць у сваёй долі замежны капітал. А манапалістамі страхаваньня для выезду за мяжу сталі чатыры кампаніі: “Белдзяржстрах”, “ТАСК”, “Белнафтастрах” і “Прамтрансінвэст”.

Адзін з кіраўнікоў фірмы “Альвэна”, Сяргей Сасноўскі, лічыць, што рэвізію страхавога рынку пралабіравалі прадстаўнікі дзяржаўных кампаній, якія не вытрымлівалі канкурэнцыі з кампаніямі камэрцыйнымі.

(Сасноўскі: ) “Ёсьць лабісты зь дзяржаўных кампаній, якія ходзяць у розныя ўстановы, адчыняюць дзьверы нагамі й робяць, што хочуць. Усе ў шоку – асабліва краіны, зь якімі мы працуем. Бо страхаваньне – гэта міжнародная актыўная дзейнасьць. Атрымліваецца, што з замежнымі партнэрамі папросту ірвуцца сувязі; у адзін момант зьнікаюць безь якіх-небудзь падставаў”.

Страхавы бізнэс у сьвеце лічыцца вельмі прыбытковым. У Расеі яго нават параўноўваюць з гандлем зброяй: летась расейскія фірмы сабралі зь людзей 17 мільярдаў даляраў (пераважна – з абавязковага аўтастрахаваньня), а выплацілі за страхавыя выпадкі толькі 2 мільярды. Але такую дыспрапорцыю не палічылі за падставу, каб зачыніць прыватныя фірмы.

У Заходняй Эўропе страхавым кампаніям дзяржава не рэглямэнтуе, што яны могуць страхаваць, а што – не: умовы працы прыватных, акцыянэрных і дзяржаўных кампаній роўныя. У беларускіх недзяржаўных страхавых кампаній прыбыткі ня ёсьць вельмі вялікімі (прыкладам, абарачэньні кампаніі “Альвэна” складаюць каля мільёна даляраў), а цяпер іх і наагул абмежаваньнямі выціскаюць з рынку.

Спэцыялісты прагназуюць, што ў выніку новых правіл страты мецьмуць ня толькі страхавыя фірмы, але й уладальнікі аўто. Выехаць ў Эўразьвяз ці нават ува Ўкраіну безь “зялёнай карты” ўжо немагчыма. І калі дагэтуль набыць поліс можна было ў адной са шматлікіх страхавых фірм (35 эўра на два тыдні для Эўразьвязу й 5 эўра – для Ўкраіны й Малдовы), то цяпер давядзецца купляць “зялёную карту” толькі ў дзяржаўных установах. А таму трэба чакаць вялікіх чэргаў. Страты ад новага Ўказу Лукашэнкі адчуе й сама дзяржава – лічыць адзін з кіраўнікоў кампаніі “Альвэна”, Сяргей Сасноўскі.

(Сасноўскі: ) “Інвэстары ў галіне страхаваньня адназначна адсюль сыдуць, бо тое поле дзейнасьці, што было, цяпер абмежавана на 70%. Мы ўсё яшчэ спадзяваліся, што тут будзе панаваць розум і цывілізаваны падыход да страхавога рынку, індустрыя будзе разьвівацца. Але яе паступова хаваюць. Яе папросту ня будзе. Савецкія часы наступаюць. Ды мы ня думалі, што так хутка. Усе будуць стаяць у чэргах. І на вас яшчэ паглядзяць: хто вы й які вы. Усё зроблена насуперак здароваму сэнсу. Трэба сядзець і чакаць, што яшчэ нешта забяруць без усялякіх падставаў. Нехта захацеў – дамовіліся, зрабілі”.

А тым часам, нібы ў якасьці кампэнсацыі, дзяржаўныя чыноўнікі раяць недзяржаўным кампаніям, мусова пазбаўленым права страхаваць транспарт, заняцца страхаваньнем жыцьця ды асабістай маёмасьці грамадзян.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG