Лінкі ўнівэрсальнага доступу

Латвія ўвяла візы новага ўзору. Што цяпер трэба, каб наведаць Латвію?


Ігар Карней, Менск Латвія першай сярод новых краінаў Эўразьвязу пачала выдаваць візы адзінага эўраўзору. Галоўныя адрозьненьні новай візы — наяўнасьць на блянку ў пашпарце лічбавага фотаздымку, а таксама шэраг ахоўных элемэнтаў, якія выключаюць магчымасьць падробкі візавых дакумэнтаў. Ці не ўскладніць гэта беларускім грамадзянам падрыхтоўку неабходных для атрыманьня візы дакумэнтаў, і ці не адаб’юцца навацыі на тэрмінах іх афармленьня?

У Консульскім аддзеле амбасады Латвіі ў Менску мне сказалі, што новая віза адрозьніваецца, найперш, больш дасканалымі элемэнтамі аховы ад падробак: гэта асаблівая папера і галяграма з сымболікай Эўразьвязу. Самае істотнае з новага ў тым, што ў дзень атрыманьня візы ці віду на жыхарства ў консульстве робіцца яшчэ лічбавы фотаздымак, які разам з усімі дадзенымі наносіцца на адмысловы блянк і пасьля ўклейваецца ў пашпарт. Крыху ўскладнілася анкета, якую трэба запаўняць падчас афармленьня дакумэнтаў на выезд. Што тычыцца пытаньня, ці не адаб’ецца гэта на тэрмінах атрыманьня візавых дакумэнтаў, дык генэральны консул амбасады Латвіі ў Менску Марыя Ягорушкіна пераконвае, што тэхнічнай працы будзе болей толькі ў супрацоўнікаў кансуляту.

(Ягорушкіна: ) “Гэта займае болей часу, натуральна. Нам цяпер цяжэй. Але людзі наўрад ці пацерпяць: як выдавалі мы візы за тыдзень, так гэтыя тэрміны і вытрымліваем. Адзінае, праблемы могуць узьнікнуць з тым, што падаваць неабходна тыя фотаздымкі, што былі зробленыя не раней за тры апошнія месяцы. Старэйшых нельга. А ў астатнім цяжкасьцяў для людзей няма ніякіх. Складанасьці для супрацоўнікаў”.

Раней была інфармацыя, што візы з фотаздымкамі Эўразьвяз меўся выдаваць толькі ў 2007 годзе. Але чаму гэта сталі рабіць амаль на тры гады раней заплянаванага тэрміну? Адказ даволі просты: скарэктаваць тэрміны Эўразьвяз прымусілі тэракты 11 верасьня ў Нью-Ёрку і 11 сакавіка ў Мадрыдзе. Цяпер, паводле рашэньня Эўракамісіі, усе краіны-сябры Эўразьвязу абавязаныя да 3 чэрвеня 2005 году ўвесьці візы адзінага ўзору, а да 14 жніўня — віды на жыхарства. Аднак тая ж Латвія справілася з задачай больш апэратыўна і першай ня толькі сярод новых краінаў альянсу, але і шэрагу сталых сябраў, увяла ў дзеяньне візы адзінага эўраўзору. Іншыя краіны пакрысе таксама ідуць у гэтым кірунку. Так, ад мінулай зімы і Чэхія выдае візы з фотаздымкам.

Калі мы ўжо гаворым пра візы, будзе цікава даведацца, ці не зьмяніўся кошт латыскай візы? Гэта актуальна для беларусаў, якія маюць у суседняй краіне сваякоў, сяброў. У кансуляце паведамілі, што пасьля далучэньня Латвіі да Эўразьвязу кошты крыху зьмяніліся. Цяпер, паводле Генэральнага консула Марыі Ягорушкінай, усе аднаразовыя і двухразовыя візы, незалежна ад тэрміну знаходжаньня ў Латвіі, каштуюць 35 эўра, а шматразовыя — 70 эўра.

Яшчэ адзначу, што эўрапейскія чыноўнікі, распрацоўваючы ўзоры новых візаў, імкнуліся дакладна вызначыць аб’ём інфармацыі пра чалавека, якая ўключаная ў візу. І робіцца гэта, як кажуць у прадстаўніцтвах краінаў Эўразьвязу, толькі з патрабаваньняў бясьпекі.
XS
SM
MD
LG