Лінкі ўнівэрсальнага доступу

Дэпутаты групы “Рэспубліка” могуць перанесьці галадоўку на кватэру


Юры Сьвірко, Менск Пра гэта Свабодзе заявіў кіраўнік групы назіраньня за галадоўнікамі Ўладзімер Колас, якога ў Дом ураду не пусьцілі, як і акрэдытаваных у Палаце прадстаўнікоў журналістаў. Афіцыйныя ўлады кажуць, што пра галадоўку нічога ня ведаюць, і рабіць нейкія захады не зьбіраюцца.

Найперш я патэлефанаваў Уладзімеру Коласу, былому дырэктару Нацыянальнага гуманітарнага ліцэю, ды спытаўся, ці вядзецца назіраньне за галадоўкай трох дэпутатаў.

(Колас: ) “Мне таксама паведамілі пра гэта. Ну і што? Так”.

(Карэспандэнт: ) “Як вы назіраеце?”

(Колас: ) “Ну як назіраю — не даю ім есьці. Вось і ўсё. Трэба назіраньне — як засьведчыць, што сапраўды галадоўка? І дзеля таго, каб сачыць за станам іхнага здароўя. Таму мы будзем як рада інтэлігенцыі, як грамадзкая ініцыятыва шукаць лекараў, якія бы маглі сачыць за станам іхнага здароўя, а потым вырашаць, якім чынам мы гэта ўсё будзем рабіць”.

(Карэспандэнт: ) “А вас пусьцілі ў Дом ураду?”

(Колас: ) “Не, мяне ў Дом ураду не пусьцілі”.

(Карэспандэнт: ) “Будзеце так, завочна назіраць?”

(Колас: ) “Не, я думаю, што гэтая галадоўка перамесьціцца, так сказаць, на кватэру Фралова, таму што мы ведаем сумныя аб’яўленьні галадоўкі ў тым жа самым будынку і чым гэта скончылася. Таму мы прадбачым, што яна будзе адбывацца ў іншым месцы”.

Спадар Колас меў на ўвазе ноч на 12 красавіка 1995 году, калі група дэпутатаў апазыцыі Беларускага Народнага Фронту на чале зь Зянонам Пазьняком распачала галадоўку проста ў залі паседжаньняў Вярхоўнага Савету, дзе цяпер засядае Палата прадстаўнікоў. Тады дэпутаты засталіся нанач, а начальнік галоўнай управы дзяржаўнай аховы Міхаіл Цесавец паабяцаў мне ды іншым журналістам, што ўначы парлямэнтароў чапаць ня будуць. Насамрэч апазыцыйных дэпутатаў гвалтам выдалілі з Дому ўраду.

Ці не паўторыцца тое самае цяпер? Я зьвязаўся з начальнікам адміністрацыйна-гаспадарчага комплексу “Дом ураду” Філіпам Высоцкім:

(Карэспандэнт: ) “Фралоў, Скрабец і Парфяновіч абвесьцілі галадоўку і сказалі, што будуць галадаваць у сваіх кабінэтах…”

(Высоцкі: ) “Упершыню чую пра гэта, шчыра кажучы…”

(Карэспандэнт: ) “А які рэжым у будынку?”

(Высоцкі: ) “Справа ў тым, што гэта, уласна, ня мой напрамак абсалютна. Курыруе ўсе пытаньні таварыш Хурсін — кіраўнік сакратарыяту. У мяне зусім іншыя функцыі”.

(Карэспандэнт: ) “А вы можаце кантраляваць, што там уначы робіцца?”

(Высоцкі: ) “Не, гэта ня мой напрамак. Тут ёсьць служба бясьпекі”.

Дзяжурны службы бясьпекі прэзыдэнта, якая ахоўвае Дом ураду, сказаў, што інфармацыяй пра галадоўку не валодае, але паабяцаў паінфармаваць мяне пазьней. А прэсавая сакратарка Аляксандра Лукашэнкі Натальля Пяткевіч адразу заявіла, што ані яна, ані ейны шэф галадаваньне дэпутатаў “не камэнтавалі”.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG