Лінкі ўнівэрсальнага доступу

Гомельскі аблсуд адхіліў прэтэнзіі сябраў АГП да выбарчых камісіяў


Радыё Свабода Сёньня Гомельскі абласны суд адхіліў скаргі двух сябраў Аб’яднанай грамадзянскай партыі на адмову выбарчых камісіяў зарэгістраваць іх кандыдатамі ў дэпутаты мясцовых саветаў.

Старшыня Гомельскай гарадзкой арганізацыі АГП Андрэй Толчын аспрэчваў у судзе адмову ў рэгістрацыі кандыдатам у дэпутаты гарсавету па Менскай выбарчай акрузе №22.

Прадстаўнікі гарадзкой выбарчай камісіі Ірына Раманюк і Юлія Дзенісёнак распавялі суду, што ў сямёх падпісантаў за вылучэньне кандыдатам Андрэя Толчына недакладна пазначаныя пэрсанальныя зьвесткі. Да таго ж спадар Толчын не прапісаны ў горадзе — жыве ў сястры без прапіскі. Андрэя Толчына такая аргумэнтацыя зьдзівіла.

(Толчын: ) “З гледзішча камісіі, я не існую ў прыродзе. Я жыву ў горадзе з 1967 году, а зь іхнага гледзішча — не пражываю. Мяне гэта вельмі абурыла, таму я й зьвярнуўся ў суд. Дарэчы, я быў дэпутатам гарсавету 21-га скліканьня, чальцом прэзыдыюму й працаваў у Гомельскім гарадзкім савеце”, — сказаў Андрэй Толчын.

У суд ён прывёў трох сьведак, у тым ліку й сястру, у кватэры якой пастаянна жыве.

Судзьдзя Леанора Буянкова адхіліла скаргу Андрэя Толчына, указаўшы, што камісія дзейнічала ў межах заканадаўства. На гэтай жа падставе не задаволіла судзьдзя й скаргі другога сябра АГП Уладзімера Кацоры, які аспрэчваў адмову акруговай выбарчай камісіі зарэгістраваць яго кандыдатам у дэпутаты аблсавету ў Рошчынскай выбарчай акрузе.

Спадар Кацора аспрэчваў найперш выснову камісіі пра тое, што ён недакладна пазначыў у анкеце зьвесткі пра месца працы. На думку камісіі, пасада намесьніка старшыні абласной арганізацыі АГП не зьяўляецца месцам працы.
XS
SM
MD
LG