Лінкі ўнівэрсальнага доступу

Карупцыя перашкаджае беларускім прадпрымальнікам


Міхал Стэльмак, Менск Прадпрымальнікі пачалі падсумаваньне вынікаў дзейнасьці ў 2006 годзе. Адной з галоўных перашкод ў справе разьвіцьця бізнэсу яны лічаць высокі ў краіне ўзровень карупцыі.

Карупцыі ў Беларусі спрыяе цяперашняя структура нацыянальнай эканомікі. Да такой высновы прыйшлі у Менскім сталічным саюзе прадпрымальнікаў. Меркаваньне лідэра саюзу Уладзімера Карагіна:

(Карагін: ) “У нас занадта многа дзяржавы ў эканоміцы. А дзе шмат дзяржавы ў эканоміцы, там заўжды будзе вялікая карупцыя. І многія прадпрымальнікі, як мы выявілі, не ведаюць, як паводзіць сябе ў гэтай сытуацыі. Мы праводзілі сустрэчы, дзе расказалі прадпрымальнікам іх правы, каб мярзотнікі, казнакрады не пілі нашай крыві”.

Менскі сталічны саюз адкрыў “гарачую лінію” для прадпрымальнікаў, каб супрацьдзейнічаць хабарніцтву й паборам. Паводле спадара Карагіна, бізнэсоўцы тэлефануюць й просяць дапамогі – абароны ад чыноўнікаў-хабарнікаў.

Яшчэ больш складаная сытуацыя з карупцыяй у рэгіёнах. Гаворыць актывістка Віцебскай асацыяцыі наймальнікаў і прадпрымальнікаў Ніна Лук’янава:

(Лук’янава: ) “Парушаюцца ўсялякія законы рынку. Мясцовая адміністрацыя бярэ на сябе правы: патрэбен гэты бізнэс ці не. Гэта адбываецца з-за недасканаласьці заканадаўства, якое дазваляе мясцовым чыноўнікам праяўляць сваю волю як захочуць”.

Падобная сытуацыя й на Магілёўшчыне. Прадстаўнікі “вэртыкалі”, як лічаць бізнэсоўцы, адчуваюць сябе тут сапраўднымі гаспадарамі. Старшыня абласнога грамадзкага аб’яднаньня прадпрымальнікаў Тацяна Казлоўская:

(Казлоўская: ) “Вялікія правы дадзены старшыням райвыканкамаў, якія вырашаюць, якому бізнэсу існаваць, а якому не, хто будзе працаваць, а хто не, каму даць ліцэнзію, а каму не. Бываюць такія перагібы, калі прыяжджаюць да прадпрымальніка і пачынаюць патрабаваць такія рэчы, якія не зусім прымальныя для прадпрымальніка, і што “мы цябе праверкамі пакараем”.

На Берасьцейшчыне абласны саюз прадпрымальнікаў сёлета не аднойчы спрабаваў змагацца з тутэйшымі карупцыянерамі. Аднак гэта складана, прызнаецца іх лідэр Ніна Карпінчык:

(Карпінчык: ) “У сьнежні гэтага году мы хацелі правесьці сэмінар для сяброў нашага саюзу і тых, хто не зьяўляецца імі, сэмінар, бясплатны, на тэму пра выкананьне закону аб карупцыі. Выканкам мясцовага Савету, намесьнік старшыні Маларыцкага райвыканкаму сказаў, што няма неабходнасьці праводзіць сэмінар”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG