Лінкі ўнівэрсальнага доступу

Чаму Мілінкевіч ня будзе вылучацца ў мясцовы савет?


Уладзімер Глод, Менск Былы кандыдат на прэзыдэнта Беларусі Аляксандар Мілінкевіч у інтэрвію нашаму Радыё заявіў, што ён ня будзе балятавацца ў дэпутаты мясцовага ўзроўню. Ён абраў іншую форму ўдзелу у выбарах.

Сваё рашэньне Аляксандар Мілінкевіч тлумачыць так:

(Мілінкевіч: ) "Я думаў над тым, каб удзельнічаць у выбарах. Але абраў іншую схему. Вельмі многія кандыдаты ў дэпутаты ўключаюць мяне ў свае групы па збору подпісаў. Гэта адбылося ўжо ў дзясятках гарадоў. І я зьбіраюся езьдзіць па гэтых гарадох: прыяжджаю на дзень, зьбіраю подпісы, іду ў райвыканкам, сьведчу падтрымку гэтаму чалавеку, дэманструем, што мы – адзіная каманда і падчас прэзыдэнцкіх выбараў, і сёньня. А калі пачнецца агітацыя, наведаю гэтыя гарады і буду агітаваць за гэтых кандыдатаў. Так я зраблю больш, чым на адным участку".

Са словаў прэсавага сакратара Мілінкевіча Паўла Мажэйкі, ужо больш за паўсотні патэнцыйных прэтэндэнтаў на дэпутацкія мандаты ўключылі ў сьпіс сваіх ініцыятыўных групаў былога кандыдата на прэзыдэнты. Цікаўлюся ў аднаго зь іх – Аляксандра Жучкова, чаму ён гэта зрабіў?

(Жучкоў: ) "Я працаваў у яго ініцыятыўнай групе, калі зьбіралі галасы ў падтрымку Мілінкевіча падчас прэзыдэнцкай кампаніі. І я сабраў даволі шмат галасоў. Паміж намі поўнае ўзаемаразуменьне, павага. Я спадзяюся, што ў які-небудзь дзень ён пройдзе са мной па маёй акрузе. І гэта дасьць мне дадатковыя галасы ў падтрымку. І яшчэ гэта магчымасьць данесьці да людзей, што мы ідзем адной камандай – той, якая склалася падчас прэзыдэнцкай кампаніі. Што гэтая каманда нікуды ня дзелася, што яна працягвае працаваць".

Аднак ня ўсе дэмакратычныя кандыдаты ў дэпутаты скарысталіся магчымасьцю прыцягнуць у сваю асабістую кампанію такога вядомага чалавека. Леў Марголін, які балятуецца ў Менскі абласны савет, гаворыць:

(Марголін: ) "Тыя, хто хочуць уключыць Мілінкевіча ў якасьці валянтэра альбо пазьней у якасьці даверанай асобы, павінны напісаць адмысловую заяву. Там значыцца, што я прашу спадара Мілінкевіча далучыцца да сваёй групы. Але потым я даю згоду ўвайсьці у склад руху "За свабоду!". Атрымліваецца як бы нейкі бартэр. Мілінкевіч прыедзе ў ваш горад, але ён прыедзе толькі да тых, хто згодны далучыцца да яго руху. А я пакуль што не гатовы да гэтага".

Ня будзе вылучацца ў дэпутаты і Станіслаў Шушкевіч. Але зь іншай прычыны: ён заклікае байкатаваць выбары. Што тычыцца Вінцука Вячоркі, Сяргея Калякіна, Анатоля Лябедзькі, дык яны хочуць стаць дэпутатамі сталічнага гарадзкога савету.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG