Лінкі ўнівэрсальнага доступу

Італьянцы прапануюць прызнаць Віку Мароз палітычнай уцякачкай


Радыё Свабода Сёньня ў генуэскім Палацы юстыцыі адбылося паседжаньне апэляцыйнага суду, які мусіць вырашыць лёс 10-гадовай беларускі Вікі Мароз. Першае паседжаньне доўжылася гадзіну. Судзьдзя заявіў, што рашэньне будзе празь некалькі дзён. Як паведамляе італьянская прэса, сёньня ў будынак суду таксама прыбылі сямейная пара Джуста—Барначын і беларускі амбасадар Аляксей Скрыпко.

Выданьні пішуць, што да судовай адказнасьці прыцягнуць абедзьвюх бабуляў — маці Алесандра і Марыі, якія ўчора ў інтэрвію мясцовай прэсе прызналіся ў выкраданьні дзяўчынкі. Адкажуць як суўдзельнікі й сямейная пара Джуста й Барначын. Як сьведчаць назіральнікі, максымальны прысуд, які можа чакаць выкрадальнікаў, — штраф.

У сёньняшнім інтэрвію для італьянскага радыё й тэлеканалу "TG 5" маці Алесандра Джуста Элена Даніна (на здымку) заявіла, што не шкадуе пра свой учынак. Яна кажа, што гэтак адбылося з-за любові да дзяўчынкі, а таксама ад адчаю — тры гады італьянская сям’я безвынікова грукалася ва ўсе магчымыя беларускія дзьверы, спрабуючы ўдачарыць Віку.

Абедзьве бабулі матывавалі свае дзеяньні тым, што дзяўчо казала, што заб’е сябе, калі яе вернуць дадому ў Беларусь. Жанчыны таксама сьведчаць, што ўчорашняе затрыманьне Вікі ў Альпах адбылося вельмі карэктна, дзяўчынка не спалохалася пераапранутых жанчын-карабінэрак, калі тыя ўвайшлі ў манастырскі пакой. Віка нават пацалавала адну з жанчын, калі тая ўзяла яе на рукі.

У італьянскіх выданьнях зьмешчаныя фатаграфіі выкрадальніц і зарэтушаванае фота дзяўчынкі. Італьянскае заканадаўства забараняе публікаваць здымкі дзяцей у падобных афіцыйных матэрыялах.

Сёньня у Італіі было зроблена некалькі палітычных заяваў наконт справы Вікі Мароз.

Міністар у справах сям’і Розі Біндзі прапанавала, каб італьянскі ўрад зьвярнуўся да беларускага боку з просьбай аднавіць паездкі беларускіх дзяцей ў Італію, а таксама аднавіць спыненую працэдуру ўсынаўленьня 600 беларускіх дзяцей.

Камісія сэнатараў Італьянскай Рэспублікі зьвярнулася да беларускага амбасадара з просьбай зважаць на псыхафізычны стан дзяўчынкі. Напярэдадні васямнаццаць італьянскіх сэнатараў падпісалі дакумэнт аб міждзяржаўным пагадненьні ў справе аздараўленчых паездак у Італію дзяцей з Усходняй Эўропы. Яны імкнуцца, каб падобнае не паўтарылася.

Таксама зварот зрабіла Італьянская нацыянальная фэдэрацыя падвоенага бацькоўства. Яе сябры прапанавалі на аснове канвэнцыі ААН у справе дзяцей надаць Віцы Мароз статус палітычнай уцякачкі.

Журналістка “Радыё Ватыкан” і сябра беларускай суполкі ў Рыме Алена Мартэцкая зьмясьціла наступную заяву на сайце гэтага радыё:

(Мартэцкая: ) “Лічу, што Віка Мароз стала нацыянальнай гераіняй. Бо яна зрабіла ў Італіі значна больш для веданьня яе Бацькаўшчыны, чым усе беларускія амбасадары за ўсю маладую гісторыю беларускай краіны. Гэтае дзіця мае права адкрыць новы сьпіс ганьбы нашага часу ў пытаньні ўсыноўленых дзяцей. Яна мае права атрымаць італьянскую сям’ю і застацца ганаровай і рэальнай грамадзянкай Беларусі.

Беларусі, каб дапамагчы такім дзецям са складаным лёсам не губляць уласнай тоеснасьці, трэба вучыцца ў больш старых і цывілізаваных краінаў не забараняць, а прапаноўваць беларускія летнікі для такіх дзяцей разам зь іхнымі замежнымі бацькамі. Хто ведае, можа пры такім стаўленьні праз дваццаць гадоў яны папросяцца назад на бацькаўшчыну”.
Ігар Лосік Кацярына Андрэева Ірына Слаўнікава Марына Золатава Ягор Марціновіч

Самае папулярнае

XS
SM
MD
LG