Лінкі ўнівэрсальнага доступу

<b/>Мілінкевіч: Рэфэрэндум прывядзе да зьнікненьня Беларусі


Радыё Свабода Магчымы “аб’яднаўчы” расійска-беларускі рэфэрэндум стаў галоўнай тэмай сёньняшняй сустрэчы ў Менску лідэра аб’яднаных дэмакратычных сіл Беларусі Аляксандра Мілінкевіча з прадстаўнікамі дыпляматычнага корпусу шэрагу эўрапейскіх краін, акрэдытаваных у Беларусі.

Як паведамляе сайт палітыка, лідэр аб’яднаных дэмакратычных сіл зьвярнуўся праз дыпляматаў ды ўрадаў эўрапейскіх краін з просьбай “не чакаць прызначэньня даты рэфэрэндуму, а ўжо ў самы найбліжэйшы час выпрацаваць адзіную пазыцыю дзяржаваў Эўропы па непрызнаньні вынікаў рэфэрэндуму.”

Сваю пазыцыю Аляксандр Мілінкевіч патлумачыў тым, што ў сёньняшніх беларускіх умовах нельга разьлічваць нават на мінімальную аб’ектыўнасьць і празрыстасьць вынікаў рэфэрэндуму.

"Ва ўмовах татальнай манаполіі дзяржавы на інфармацыю большасьць беларусаў не змогуць атрымаць усёй інфармацыі пра рэальныя пагрозы рэфэрэндуму і пра небясьпеку страты Беларусьсю незалежнасьці і сувэрэнітэту. Сёньня таксама не існуе рэальных мэханізмаў кантролю грамадзтва за падрыхтоўкай і працэсам галасаваньня, а таксама за падлікам галасоў. У гэтых умовах, плянаваны рэфэрэндум стане сур’ёзнай палітычнай падзеяй, якая можа прывесьці да зьнікненьня Беларусі з палітычнай карты сьвету", - заявіў Аляксандр Мілінкевіч. Аляксандр Мілінкевіч адзначыў, што эўрапейскія краіны павінны называць працэсы сваімі імёнамі – “гэта не будзе аб’яднаньне двух краін, гэта сапраўдны аншлюс, эканамічнае паглынаньне Беларусі.”

"Беларусь сёньня з’яўляецца своеасаблівай таблеткай, лекам для пэўных імпэрскіх сіл у Расіі. Лукашэнка загуляўся ў аб’яднаньне, ён загнаны ў кут і выбару ўжо не мае. Сёньня яго нельга лічыць гарантам незалежнасьці Беларусі, гарантам сёньня з’яўляецца беларускі народ. І я ўжо сёньня заяўляю аб пратэстах у выпадку прызначэньня і правядзеньня рэфэрэндуму", - сказаў лідэр аб’яднаных дэмакратычных сіл.

На сустрэчы прысутнічалі дыпляматычныя прадстаўнікі Францыі, Нямеччыны, Вялікай Брытаніі, Швэцыі, Італіі, Літвы, Латвіі, Румыніі, Чэхіі, Польшчы, Нідэрляндаў, Славакіі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG