Лінкі ўнівэрсальнага доступу

Літоўскі лёгкаматорны самалёт сканфіскаваў беларускі суд


Радыё Свабода Ашмянскі раённы суд сканфіскаваў у даход беларускай дзяржавы літоўскі лёгкаматорны самалёт, які на пачатку чэрвеня памылкова трапіў у Беларусь і быў затрыманы беларускімі памежнікамі разам зь пілётам і пасажыркай. Уладальнікі самалёта зьбіраюцца абскарджваць судовае рашэньне.

Паседжаньне наконт парушэньня літоўскімі лётчыкамі мытнага заканадаўства вяла выканаўца абавязкаў старшыні Ашмянскага суду Тацяна Емяльяновіч. У канцылярыі суду паведамілі, што цяпер яна занятая ў іншым працэсе і ня можа пракамэнтаваць свайго рашэньня. Інтарэсы ўладальнікаў самалёта прадстаўляў адвакат Юры Як. Ён паведаміў “Свабодзе”, што суд прызнаў літоўскага лётчыка вінаватым у парушэньні мытных правілаў паводле нядбайнасьці й пакараў штрафам на 3 мільёны 100 тысяч беларускіх рублёў з канфіскацыяй транспартнага сродку. Сканфіскаваны ў даход дзяржавы лёгкі самалёт нямецкай вытворчасьці каштуе 65 тысяч эўра. Раней паводле рашэньня Воранаўскага суду за несанкцыянаванае перасячэньне беларускай мяжы літоўскія грамадзяне сплацілі 4 мільёны 650 тысяч рублёў штрафу.

Адвакат Юры Як кажа, што будзе абскарджваць гэтыя рашэньні ў абласным судзе:

(Як: ) “Будзем рыхтаваць на скасаваньне і першага рашэньня, якое было прынятае ў Воранаве, і сёньняшняга, ухваленага ў Ашмянах”.

Дырэктар каўнаскага клюбу пілётаў “Лекіё” Далюс Лекіс зазначыў, што рашэньне беларускага суду істотна шкодзіць ягонай працы:

(Лекіс: ) “Гэта падрывае нашую дзейнасьць, вельмі моцна зашкодзіць клюбу, нашыя ўсе пляны, калі яго ня вернуць, будзе цяжка ажыцьцявіць”.

Клюб “Лекіё” зьяўляецца некамэрцыйнай арганізацыяй, якая займаецца авіяцыйнай асьветай і навучае прыватных асобаў (пераважна моладзь), якія хочуць атрымаць ліцэнзію на кіраваньне лёгкім самалётам. Спадар Лекіс кажа, што несанкцыянаванае перасячэньня беларускай мяжы літоўскім лётчыкам Тадасам Блажавічусам і ягонай сястрой Індрэ Блажавічутэ адбылося выпадкова, яны ня мелі такога намеру.

(Лекіс: ) “Абсалютна. Гэты чалавек заблукаў, бо гэта вучань, які налятаў усяго толькі дваццаць гадзінаў, ён трэніраваўся ляцець па маршруце, па карце і компасе”.

Затрыманы ў Беларусі самалёт — адзін з трох, якімі карыстаецца клюб, ён быў адзіным новым самалётам, які быў куплены за грошы сябраў клюбу.

6 чэрвеня лёгкаматорны літоўскі самалёт зь пілётам і пасажыркай несанкцыянавана прыляцеў у Беларусь. На перахоп самалёта выслалі беларускі вайсковы штурмавік Су-25 з авіябазы ў Лідзе. Літоўскага лётчыка прымусілі прызямліцца ў Лідзе, да 14 чэрвеня яго трымалі пад вартай. Ужо ў першым тлумачэньні Тадас Блажавічус паведаміў, што заляцеў у Беларусь памылкова.

Тым часам у канцы чэрвеня літоўскія СМІ паведамілі, што на тэрыторыю Літвы ў памежнай зоне двойчы заляцеў беларускі вайсковы верталёт. Беларускія ўлады пацьвердзілі, што адбываюцца плянавыя палёты дзеля агляду мяжы, аднак адмовілі факт парушэньня паветранай прасторы Літвы.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG