Лінкі ўнівэрсальнага доступу

Што адбываецца зь вязьнямі, якія былі намэнклятурнымі начальнікамі?


Ігар Карней, Менск У беларускіх калёніях працягваюць адбываць розныя тэрміны зьняволеньня былыя кіраўнікі й адказныя супрацоўнікі дзяржаўных установаў. Сярод іх — былы старшыня Нацыянальнай тэлерадыёкампаніі Ягор Рыбакоў, экс-дырэктар МТЗ Міхаіл Лявонаў, колішні кіраўнік Менскага падшыпнікавага заводу Валеры Пенза ды іншыя.

Найбольшыя тэрміны зьняволеньня адбываюць затрыманы ў 2003 годзе дырэктар Менскага трактарнага заводу Міхаіл Лявонаў і арыштаваны напачатку 2004-га — кіраўнік Нацыянальнай тэлерадыёкампаніі Ягор Рыбакоў.

На рашэньне Вярхоўнага суду Лявонаў, абвінавачаны па 15 артыкулах і прымушаны выплаціць дзяржаве ў эквіваленце каля 15 мільёнаў даляраў, адбывае 10 гадоў пазбаўленьня волі з канфіскацыяй маёмасьці й забаронай пяць гадоў займаць кіроўныя пасады. Жонка Лявонава, Алена Георгіеўна, расказала пра нядаўнюю сустрэчу з мужам:

(Лявонава: ) “26 траўня ў нас была трохдзённая сустрэча. Дзякуй Богу, неяк ён трымаецца. Ён усё нармальна разумее, правільна разумее, што чакаць якойсьці літасьці проста так, каб падарылі вызваленьне як нейкае сьвята, ужо не дачакаесься. А сам ён не імкнецца пісаць ці прасіць. Таму што можна прасіць, калі вінаваты й прасіць памілаваць. А калі чалавек не вінаваты і адвалілі столькі гадоў — ну што ж, гэта значыць, прасіць і прызнаць сябе вінаватым”.

У лютым 2005 году да 11 гадоў пазбаўленьня волі з адбываньнем тэрміну ў калёніі ўзмоцненага рэжыму Вярхоўным судом асуджаны Ягор Рыбакоў. Рыбакова абвінавацілі ў выкарыстаньні службовага становішча дзеля легалізацыі сродкаў, атрыманых незаконным шляхам. Былы адвакат Рыбакова Дзьмітры Гарачка кажа, што цяпер Рыбакоў, які ўзначальвае ў Шклоўскай калёніі тэлестудыю, абыходзіцца без паслугаў юрыста.

(Гарачка: ) “Адвакат давёў справу, праз суд яна прайшла, а цяпер, наколькі я ведаю, яны ўсе пытаньні вырашаюць самі, без прыцягненьня адвакатаў. Прынамсі, па крымінальнай справе. Іншымі словамі, пішуць скаргі, ставяць пытаньне аб памілаваньні, усё вырашаюць самі. Я маю на ўвазе не сям’ю, а асабіста яго самога, Рыбакова”.

Бліжэйшыя некалькі гадоў правядуць за кратамі кіраўнікі Менскага падшыпнікавага заводу. Паводле артыкулу “Злоўжываньне ўладай і службовымі паўнамоцтвамі” былы дырэктар заводу Валеры Пенза, які 10 гадоў кіраваў прадпрыемствам, 14 сакавіка быў асуджаны да 6 гадоў пазбаўленьня волі без канфіскацыі маёмасьці. Начальнік аддзелу збыту Віктар Канановіч і кіраўнік фінансавага аддзелу Мікалай Юргель атрымалі па 3,5 году кожны. Намесьнік дырэктара па эканоміцы Аляксандар Прохарчык асуджаны да такога ж тэрміну без канфіскацыі маёмасьці.

Цэлы шэраг гучных справаў яшчэ чакае судовых вэрдыктаў. 10 сьнежня 2004 году прад’яўлена абвінавачаньне кіраўніцтву прадпрыемства “Нафтан”, уключна з гендырэктарам Канстанцінам Часнавіцкім, кіраўнікамі камэрцыйнага ўпраўленьня Дзьмітрыем Бандарчуком і Сяргеем Мартынавым. Усе затрыманыя паводле падазрэньня ў крадзяжы буйных грашовых сумаў. На падазрэньне ў перавышэньні службовых паўнамоцтваў летась 12 верасьня затрыманы выканаўца абавязкаў генэральнага дырэктара “Джэм-Банку” Сяргей Блізьнюк (яшчэ адзін банкір, экс-кіраўнік “Комплекс-банку” Яўген Краўцоў за кратамі ўжо некалькі гадоў). Пры канцы мінулага году праваахоўныя органы затрымалі камэрцыйнага дырэктара БелАЗу Андрэя Ільянава. Ён падазраецца ў крадзяжы праз злоўжываньне службовымі паўнамоцтвамі. Сума стратаў –больш як 150 тысяч даляраў.

Некаторым афіцыйным асобам удалося пазьбегнуць турэмных нараў.

Летась на загад Аляксандра Лукашэнкі памілаваная асудажная за эканамічныя злачынствы экс-кіраўніца справаў прэзыдэнта Галіна Жураўкова (дарэчы, затрыманыя разам зь ёй кіраўнікі прадпрыемства кіраўніцтва справаў “Белая Русь” (у прыватнасьці, намесьнік дырэктар Аляксандар Мурашка) адбываюць зьняволеньне). А ня так даўно былы старшыня Дзяржаўнага камітэту авіяцыі Фёдар Іваноў, абвінавачаны ва злоўжываньні ўладай, што пацягнула буйныя страты дзяржаве, абышоўся вялікім штрафам (1 тысяча базавых велічыняў).
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG