Лінкі ўнівэрсальнага доступу

А.Хазэльбах: Узбэкістан і Беларусь патрабуюць асаблівых мераў з боку ЭЗ


Тацяна Поклад, Вільня Віленская канфэрэнцыя сёлета адбываецца пад патранажам прэзыдэнтаў Літвы і Польшчы. Прэзыдэнт Літвы Валдас Адамкус у сваім вітальным слове адзначыў, што гэты форум павінен аб''яднаць высілкі дзеля стварэньня дэмакратычнага і мірнага суседзтва ў рэгіёне “між трох мораў”. Прэзыдэнт Польшчы Лех Качыньскі сказаў у часе адкрыцьця канфэрэнцыі, што паміж кіраўнікамі краінаў рэгіёну сёньня няма толькі прадстаўнікоў Беларусі.

(Качыньскі: ) “У Беларусі праблемы з дэмакратыяй, і спрыяньне дэмакратычным працэсам у гэтай частцы сьвету – асноўнае выпрабаваньне эфэктыўнасьці распаўсюду дэмакратыі. Вырашаць будзе беларускі народ, але гэтая падтрымка можа моцна дапамагчы і мае прынесьці свае вынікі неўзабаве – Беларусь далучыцца да дэмакратычнай сям''і эўрапейскіх краінаў”.

Віцэ-прэзыдэнт Фэдэральнай рады Аўстрыі Анна Элізабэт Хазэльбах сказала, што відавочна, што ёсьць дзьве краіны ў АБСЭ, якія патрабуюць асаблівых мераў з боку Эўразьвязу, – гэта Ўзбэкістан і Беларусь.

(Хазэльбах: ) “Я хацела б адзначыць блізкую і пасьпяховую каардынацыю паміж Эўразьвязам і ЗША адносна палітыкі ў дачыненьні да Беларусі. Паколькі Расея – істотная частка ўсходнеэўрапейскага суседзтва, новая эўрапейская палітыка суседзтва будзе таксама зьвяртацца да гэтага стратэгічнага партнэра Эўразьвязу. Мы, дэлегаты гэтай канфэрэнцыі, прызнаем, што ідэя свабоднага чалавека, які цешыцца грамадзянскай і палітычнай свабодай, і свабодны ад страху і нястачы, можа быць рэалізаваная толькі пры ўмовах забесьпячэньня правоў чалавека, плюралізму, дэмакратыі і законнасьці. Мы імкнемся жыць разам у міры і быць добрымі суседзямі адзін аднаму”.

Таксама Анна Элізабэт Хазэльбах гаварыла пра падтрымку незалежных СМІ ў Беларусі. Эўразьвяз мае намер выдаткаваць 10,6 мільёнаў эўра на падтрымку незалежных мэдыяў, і новы праект разьлічаны да 2013 году.

У ліку ўдзельнікаў – кіраўнік зьнешняй палітыкі Эўразьвязу і бясьпекі ў Эўразьвязе Хаўер Саляна, прадстаўнікі НАТО і інстытуцыяў Эўразьвязу. У працы канфэрэнцыі бяруць удзел прадстаўнікі Беларусі, у іх ліку Станіслаў Шушкевіч і Іна Кулей, жонка зьняволенага экс-кандыдата ў прэзыдэнты А. Мілінкевіча.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG