Лінкі ўнівэрсальнага доступу

У Віленскай канфэрэнцыі ўдзельнічаюць і дэмакраты зь Беларусі


Радыё Свабода У сталіцы Літвы сёньня пачалася штогадовая Віленская канфэрэнцыя. У ёй удзельнічаюць кіраўнікі шэрагу дзяржаў, прадстаўнікі дэмакратычных колаў Беларусі.

Беларусь на Віленскай канфэрэнцыі прадстаўляюць лідэры й актывісты дэмакратычных сіл – палітычных партый і грамадзкіх арганізацый. Вось што паведаміў Радыё Свабода адзін з удзельнікаў форуму старшыня Аб’яднанай грамадзянскай партыі Анатоль Лябедзька:

(Лябедзька: ) “У Вільні вялікая прадстаўнічая дэлегацыя. Тут адначасова некалькі пляцовак, на якіх разгортваюцца падзеі. Напрыклад, падчас працы на панэлі, на якой я ўдзельнічаў, тут і Ірына Казуліна, і Іна Кулей, і Ірына Красоўская, і Андрэй Саньнікаў. На другой панэлі-пляцоўцы прысутнічаюць Бураўкін, Законьнікаў, Лявонаў, Падгол, Алена Данэйка, шэраг іншых асоб. Прыехала вялікая група моладзі, якая выйшла, скажам так, з нашага беларускага “майдана”.

Дарэчы, на пляцоўцы, дзе праходзіў форум моладзі новых дэмакратычных краін Эўропы, сёньня, паводле Анатоля Лябедзькі, была прынята рэзалюцыя, у якой знайшла адлюстраваньне сытуацыя ў Беларусі. Удзельнікі форуму выказалі, у прыватнасьці, салідарнасьць зь беларускай моладзьдзю, якая змагаецца за мірныя перамены й свабоду ў Беларусі. Мяркуецца, што й на іншых пляцоўках Віленскай канфэрэнцыі становішча ў Беларусі будзе абмеркавана і ўвойдзе ў выніковыя дакумэнты форуму. Як зазначыў лідэр АГП, пра падзеі ў Беларусі будуць гаварыць у Вільні й кіраўнікі дзяржаваў:

(Лябедзька: ) “Сярод удзельнікаў Віленскага форуму прэзыдэнт Украіны Юшчанка, прэзыдэнт Малдовы Варонін, прэзыдэнт Грузіі Міхаіл Саакашвілі, таксама Лех Качыньскі – прэзыдэнт Польшчы, натуральна Валдас Адамкус, таксама прэзыдэнт Румыніі Траян Басеску, Арнольд Руйтэль (Эстонія), Віке Фрэйберга – прэзыдэнтка Латвіі, прэзыдэнт Баўгарыі Георгі Пырванаў і іншыя… Усяго каля 20 краін, якія прадстаўлены альбо першымі асобамі, альбо на вельмі высокім узроўні. Яшчэ ў Вільню прыехаў віцэ-прэзыдэнт ЗША Чэйні і таксама будзе прымаць удзел. Ёсьць цікавасьць да беларускага пытаньня і ў нас ёсьць насамрэч шанец зрабіць беларускае пытаньне часткай агульнаэўрапейскага парадку дня”.

Прадстаўнікоў цяперашніх уладаў Беларусі, як падкрэсьліў Анатоль Лябедзька, на Віленскую канфэрэнцыю яе арганізатары не запрашалі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG