Лінкі ўнівэрсальнага доступу

Моладзі з рэгіёнаў перашкаджаюць дабірацца да Менску


Радыё Свабода На Кастрычніцкую плошчу ў Менску прыходзяць ня толькі жыхары сталіцы, cюды прыяжджаюць і з рэгіёнаў. Зрабіць гэта многім не ўдаецца: міліцыя сочыць за патэнцыйнымі ўдзельнікамі акцыяў пратэсту.

У Жодзіне сёньня ўначы выйшлі на волю пасьля 7-дзённага арышту актывісты выбарчай каманды Мілінкевіча й моладзевага дэмакратычнага руху Сяржук Гудзілін, Яўген Ваўкавец і Алесь Чырэйка. Пра гэта Радыё Свабода паведаміла маці Сержука Алена Гудзіліна:

(Гудзіліна: ) “Сказалі, што ўсё нармалёва. Я тут ім мараль чытала — сказала, што нідзе няма той праўды. Марная ваша праца. Я кажу, што затрымалі іх, а прыпісалі зусім іншае. А яны мне, што Мілінкевіч будзе, і ўсё. Я перажываю, каб іх яшчэ там у Менску не затрымалі”.

Паводле спадарыні Гудзілінай, жодзінскія хлопцы зьбіраліся сёньня ў сталіцу, дзе на Кастрычніцкай плошчы бяруць удзел у акцыі пратэсту ня толькі менчукі, а й прадстаўнікі рэгіёнаў. У прыватнасьці, ужо дзьве ночы правёў на плошчы актывіст Віктар Бабаед з Салігорску:

(Бабаед: ) “З Салігорску было некалькі чалавек. Апроч таго, падыходзіць моладзь з Салігорску, якая навучаецца ў навучальных установах Менску. Яны мяне ведаюць, дык падыходзяць. Моладзі ўчора было трыццаць чалавек, у тым ліку шахцёры. Таксама вядомая актывістка Ніна Ярмалінская зьвярнулася ўчора з добрай прамовай. На жаль, сярод затрыманых былі й юнакі з гораду Салігорску”.

Як паведаміў спадар Бабаед, сёньня мелі намер прыехаць на плошчу ў Менск восем аўтамабіляў з салігорскімі шахцёрамі, аднак іх затрымалі на выезьдзе з Салігорску і завярнулі супрацоўнікі салігорскай дзяржаўтаінспэкцыі. Таксама з гэтай жа прычыны не змаглі выехаць з шахцёрскага гораду ў Менск некалькі моладзевых актывістаў. Складанасьці ўзьнікаюць і ў жыхароў іншых рэгіёнаў, якія зьбіраюцца прыехаць у сталіцу. Напрыклад, вось што распавёў вялейскі юнак Кастусь, які спрабаваў разам зь сябрам дабрацца да Менску:

(Кастусь: ) “Прыехалі да вакзалу да Маладэчна. Сталі купляць квіткі. Пакуль куплялі, падышлі да нас міліцыянты, убачылі ў нас джынсавыя стужкі й спыталіся: “Куды едзеце?”. Яны пачалі нас абшукваць. Шукалі-шукалі, потым узялі ў нас заплечнікі, знайшлі там джынсавы сьцяг вялікі. Завезьлі нас за мяжу Маладэчна, сказалі, каб болей не зьяўляліся. Але ж мы ня будзем здавацца… Мы пайшлі зноў да аўтавакзалу. Пачалі так купляць квіткі. Купілі квіткі, чакаем аўтобуса. Тыя ж самыя міліцыянты нас ловяць, завозяць за мяжу Маладэчна. Грошы скончыліся, аўтобусы паехалі, мы на спадарожных машынах дадому дабіраліся”.
Ігар Лосік Кацярына Андрэева Ірына Слаўнікава Марына Золатава Ягор Марціновіч
XS
SM
MD
LG