Лінкі ўнівэрсальнага доступу

Апытаньне "Свабоды": ці могуць у Беларусі абраць прэзыдэнтам жанчыну?


Радыё Свабода, Менск Ці магчыма, каб у Беларусі абралі на прэзыдэнта жанчыну? Гэтае пытаньне людзям на менскіх вуліцах задавала наша карэспандэнтка.

(Спадарыня: ) “Я лічу, што ў Беларусі жанчына можа быць прэзыдэнтам, бо на жанчыну цяпер шмат ускладзена. Гэта і сям’я, і дзеці, і праца цяжкая, а таму я лічу, што жанчына можа быць і прэзыдэнтам”.

(Спадар: ) “Мужчынам гэта ня вельмі падабаецца. Таму, з аднаго боку, гэта вельмі добра, але як для падначаленага, дык, пэўна, не заўсёды жанчыны-кіраўнікі падабаюцца”.

(Карэспандэнтка: ) “Ці можа ў Беларусі жанчына быць прэзыдэнтам, і калі так, то калі гэта можа быць?”

(Спадар: ) “Ну, калі мы будзем бачыць на палітычнай арэне жанчыну, можа быць. У блізкай, агляднай будучыні я пакуль што ня бачу, няма такой жанчыны”.

(Спадар: ) “Можа, сто адсоткаў. Жанчыны ўжо даўно дамагліся роўнасьці з мужчынамі і нават перасягнулі іх. Сур’ёзна”.

(Юначка: ) “Я думаю, што магчыма. Таму што я лічу, ня важна — мужчына альбо жанчына прэзыдэнт, галоўнае, каб нешта рабілася”.

(Юнак: ) “Ці можа быць жанчына прэзыдэнтам? Думаю, што можа быць жанчына прэзыдэнтам. Вельмі часта размаўляю з рознымі людзьмі, асабліва жанчынамі, і высьвятляецца, што жанчыны ў нас больш ініцыятыўныя. Калі гэта можа быць? Калі першая жанчына паспрабуе прапанаваць сваю кандыдатуру на пасаду прэзыдэнта”.

(Спадар: ) “Ад жанчын як ад кіраўнікоў спрабуюць адмовіцца, не зважаючы на тое, што ў пэўных абставінах іх прызначаюць кіраўнікамі. Прычынаў тут шмат, а ўвогуле для паўнаты выкананьня абавязкаў прэзыдэнта гэтую ролю павінен выконваць усё ж такі мужчына”.

(Юначка: ) “Наконт жанчыны-прэзыдэнта я ўсё ж лічу, што жанчына павінна займаць сваё месца ў сям’і зь дзецьмі. Таму што калі жанчына прысьвячае сябе працы, кар’еры, то яна забываецца пра дзяцей, пра сваю сям’ю. У нас павінна быць жанчына ўсё-такі найперш маці”.

(Спадар: ) “У прынцыпе, жаночы розум, ён такі гнуткі. Можа быць — вядома, можа”.

(Юначка: ) “Ды не, жанчына ня можа быць прэзыдэнтам. Жанчына паводле сваёй прыроды паветраная, лёгкая, узьнёслая і рамантычная. А для таго, каб кіраваць дзяржавай, патрэбная жорсткая рука”.

(Юнак: ) “Цяпер гэта немагчыма, бо жанчынам не дадуць улады. Таму што гэтая ўлада, якая цяпер, яна ні жанчынам, ні мужчынам іншым сваёй улады не аддасьць”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG