Лінкі ўнівэрсальнага доступу

Мілінкевічу і Казуліну зрываюць перадвыбарчыя сходы


Радыё Свабода У выходныя апазыцыйныя кандыдаты на прэзыдэнта Аляксандар Мілінкевіч і Аляксандар Казулін працягвалі свае перадвыбарчыя паездкі па рэгіёнах Беларусі. Прыхільнікі Аляксандра Лукашэнкі паспрабавалі сарваць агітацыйныя сходы кандыдатаў.

Кандыдаты на прэзыдэнтаў пад час сустрэч у рэгіёнах нязьменна зьбіраюць перапоўненыя залі, і калі раней, каб сапсаваць іх імідж, прыхільнікі Лукашэнкі выкарыстоўвалі нязручныя пытаньні ад вэтэранаў ці чыноўнікаў, то цяпер у справу пайшлі і крыкі, сьвіст, тупат, раскідваньне улётак. Найбольш выразна гэта выявілася на сустрэчы Мілінкевіча ў Баранавічах.

(Галасы: ) “За Лукашэнку, за Лукашэнку! За бацьку, за бацьку!”

Намесьнік кіраўніка выбарчага штабу Мілінкевіча Вінцук Вячорка перакананы: улады зразумелі, што яны прайграюць апазыцыйнаму кандыдату на такіх сустрэчах.

(Вячорка: ) “Яны зразумелі, што тут канструктыўным чынам не спрацуеш, трэба працаваць дэструктыўна. У Баранавічах была змабілізаваная ўся жывая сіла і тэхніка, якая ў іх была. Там былі і БРСМаўскія Паўлікі Марозавы, і супрацоўнікі спэцслужбаў, можа быць, нават зь іншых гарадоў”.

Аналягічныя дзеяньні выявіліся пад час наведваньня Ліды іншым кандыдатам Аляксандрам Казуліным, – паведаміла ягоная прэсавая сакратарка Ніна Шыдлоўская:

(Шыдлоўская: ) “Перабіваньне кандыдата, агрэсія, сьвіст, тупат, выкрыкваньне зь месца і недаваньне сказаць слова ці агрэсіўны накат кшталту “гаворыце няпраўду, гэта ня так”… Вельмі агрэсіўныя паводзіны і ўзьвінчваньне атмасфэры ў залі”.

Паводле Ніны Шыдлоўскай Аляксандар Казулін спраўляецца з дэструктыўнымі дзеяньнямі “уласным напорам”.

Найбольш агрэсіўна апошнія дні сябе паводзяць на сустрэчах апазыцыйных кандыдатаў сябры БРСМ. Якія ў іх матывы? Вось што казалі баранавіцкія актывісты гэтай арганізацыі.

(Сябар БРСМ: ) “Таму што Мілінкевіч выказвае інтарэсы ня нашай краіны”.

(Іншы сябар БРСМ: ) “Мы за Беларусь… Нельга абяцаць таго, што ня зможаш зрабіць”.

(Іншы сябар БРСМ: ) “Гэта выбар моладзі. Я ведаю, што можа даць нам Аляксандар Рыгоравіч, і таму я ў ім упэўнены, а ў Мілінкевічы я зусім няўпэўнены. Заўтра яго абяруць. А пасьлязаўтра прыйдуць усялякія войскі амэрыканскія. Навошта мне гэта трэба?”

(Іншы сябар БРСМ: ) “Мой лёзунг – Я супраць Мілінкевіча. А што ён мне добрага зрабіў, за ўсё маё жыцьцё? Нічога. Мне вось 18 гадоў. Няма ніякіх сацыяльных праграм, што ён можа мне даць зараз?”

Сам Аляксандар Мілінкевіч зазначае, што ў адрозьненьне ад пачатку 90-х гадоў істотная частка цяперашняй моладзі паддалася пад уплыў прапаганды.

(Мілінкевіч: ) “БРСМ усё-такі ў ізаляванай інфармацыйна краіне сваю справу робіць. Відаць, ёсьць кар’ерысты камсамольскія, а ёсьць і людзі, якія паверылі. Але гэта не большасьць моладзі”.

Паводле інфармацыі Аляксандра Мілінкевіча, улады рыхтуюць правакацыі на 19 сакавіка на цэнтральных плошчах з удзелам такой вось моладзі.

Аляксандар Лукашэнка перадвыбарчых паездак па Беларусі не ажыцьцяўляе. Сяргей Гайдукевіч аб адрасах сваіх сустрэч гаварыць адмаўляецца.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG