Лінкі ўнівэрсальнага доступу

Як кандыдаты на прэзыдэнта ставяцца да розных канфэсій у Беларусі?


Радыё Свабода На пытаньні слухачоў “Свабоды” адказваюць кандыдаты ў прэзыдэнты Аляксандар Мілінкевіч і Сяргей Гайдукевіч, прэсавы сакратар кандыдата ў прэзыдэнты Аляксандра Казуліна Ніна Шыдлоўская, а таксама лідэр Партыі камуністаў беларускай Сяргей Калякін.

(Спадар: ) “Мне хацелася б задаць пытаньне Алесю Мілінкевічу: як ён ставіцца да рэлігіі? Гэта ня важна, ці праваслаўны ён, ці каталік, ці пратэстант. Наколькі я ведаю, спадары Пазьняк, Хадыка ды іншыя сапраўды вернікі, чаго нельга сказаць наконт асобы спадара Лукашэнкі, які, падобна фарысэям, ляпае па плячы Філарэта, адначасова называючы сябе праваслаўным атэістам”.

Адказвае кандыдат у прэзыдэнты Аляксандар Мілінкевіч:

(Мілінкевіч: ) “Я з праваслаўнай сям’і, я веруючы чалавек — і даволі нялёгка ішоў да веры. Гэта ўжо ў сталым узросьце атрымалася. І для мяне вельмі важна тое, што я веруючы — гэта дапамагае, знайшоў у гэтым значнае апірышча псыхалягічнае. А што тычыцца веры і дзяржавы, то я лічу, што вельмі важна, каб дзяржава і рэлігія адно ад аднаго былі аддзеленыя, каб былі самастойныя. І надзвычай важна, каб дзяржава ставілася аднолькава да ўсіх канфэсіяў. Беларусь мае выдатныя традыцыі — традыцыі талерантнасьці, і дзяржава павінна гэта захоўваць. Я лічу, што так і будзе ў новай Беларусі”.

На пытаньне пра канфэсійную прыналежнасьць і стаўленьне да веры адказвае кандыдат у прэзыдэнты Сяргей Гайдукевіч:

(Гайдукевіч: ) “Я праваслаўны, я насамрэч добра стаўлюся — ня тое, што добра стаўлюся, у мяне дома абразы вісяць, куток для гэтага ёсьць. Я праваслаўны і крыжык нашу — дарэчы, медны. Як я магу яшчэ ставіцца, як ня шчыра і станоўча — гэта ўсё, што я хацеў бы сказаць на гэтую тэму”.

Пра канфэсійную прыналежнасьць і стаўленьне да веры кандыдата ў прэзыдэнты Аляксандра Казуліна адказвае прэсавы сакратар Ніна Шыдлоўская:

(Шыдлоўская: ) “Аляксандар Казулін неаднойчы і падчас выступаў, і падчас сустрэчаў зь людзьмі падкрэсьліваў абсалютна шчыра і пераканана, што вера — гэта тая аснова, якая трымае народ. І ён вельмі рады і вітае тое, што цяпер вера вяртаецца ў сэрцы людзей. Сам ён чалавек, які глыбока верыць — гэтак, як і ўся ягоная сям’я. Сам ён хрышчаны ў праваслаўе — і пры любой мажлівасьці, калі ён тут у Менску, то абавязкова наведвае набажэнствы. Таксама ён адзначае асноўныя рэлігійныя сьвяты”.

* * *

(Спадар: ) “У мяне пытаньне да Сяргея Калякіна. Якая ў вас, шаноўны спадар, праграма камуністаў? Коратка і дакладна. Я заўсёды камуністаў заву бальшавікамі, хоць і сам быў у партыі больш за сорак гадоў. Білет вярнуў пасьля артыкулу Кароціча ў “Московских новостях” — органе ЦК партыі. Пасьля гэтага з пасады мяне зьнялі, але я быў задаволены. Дзякуй за ўвагу”.

Адказвае лідэр Партыі камуністаў беларускай Сяргей Калякін:

(Калякін: ) “Праграма нашай партыі ўтрымлівае асноўныя мэты: гэта свабода, гэта справядлівасьць, гэта салідарнасьць, гэта дэмакратыя. Яшчэ асноўнымі палажэньнямі нашай партыі зьяўляецца тое, што мы лічым палітычную канкурэнцыю неабходнай умовай для існаваньня дэмакратычнай дзяржавы. Што ў любой краіне павінна быць шматукладная эканоміка, якая існуе ў канкурэнтных і роўных умовах. А пра тое, як мы ставімся да практыкі, якая існавала ў КПСС, то ў нашай праграме ёсьць разьдзел, у якім падкрэсьленыя тыя моманты, калі КПСС адыходзіла ад прынцыпаў сацыялізму. Да прыкладу, мы не падзяляем падыходу, калі мэта зьяўляецца падставай для выкарыстаньня ўсіх магчымых сродкаў”.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG