Лінкі ўнівэрсальнага доступу

ЦВК зарэгістравала чатырох кандыдатаў на прэзыдэнта (абноўлены)


Радыё Свабода 17 лютага Цэнтравыбаркам зарэгістраваў кандыдатамі на прэзыдэнта лідэра ЛДПБ Сяргея Гайдукевіча, старшыню БСДП “Грамада” Аляксандра Казуліна, дзейнага кіраўніка краіны Аляксандра Лукашэнку і кандыдата ад аб’яднанай апазыцыі Аляксандра Мілінкевіча. Аляксандар Лукашэнка падчас паседжаньня пачуў рэзкую крытыку на свой адрас з боку кандыдатаў ад апазыцыі, якія аспрэчылі ягонае права на ўдзел у выбарах і заявілі пра няроўныя ўмовы выбарчай кампаніі. Але Лукашэнка ад палемікі ўхіліўся.

Паводле альфабэту Аляксандар Лукашэнка мусіў бы сядзець паміж А.Казуліным і А.Мілінкевічам, але арганізатары пасадзілі яго бліжэй да сябраў ЦВК, аддзяліўшы ад апазыцыйных кандыдатаў С.Гайдукевічам. Такім чынам спадар Лукашэнка пазьбег неабходнасьці павітацца за руку з усімі канкурэнтамі. Аляксандар Казулін на сваім стале дэманстраваў кнігу Алега Алкаева “Расстрэльная каманда”.

ЦВК падвёў вынікі збору подпісаў за кандыдатаў: сапраўднымі прызналі 1 мільён 903 тысячы подпісаў за А.Лукашэнку, 183 тысячы — за Мілінкевіча, 143 тысячы — за А.Казуліна, 144 тысячы за С.Гайдукевіча. ЦВК выявіла недастатковыя зьвесткі ў дэклярацыі жонкі А.Мілінкевіча Іны Кулей, якая не ўказала 900 тысяч рублёў, што атрымала ад продажу аўтамабіля “Мазда”. Сакратар ЦВК Мікалай Лазавік гэтую неадпаведнасьць назваў неістотнай і ненаўмыснай. Старшыня ЦВК Лідзія Ярмошына не пагадзілася з гэтым і нагадала, што пазалетась падчас выбараў парлямэнту кандыдаты здымаліся з выбарчай гонкі і за меншыя сумы, але ўсё ж прапанавала зарэгістраваць Мілінкевіча:

(Ярмошына: ) “Але тут надта высокі кошт, гэта выбары прэзыдэнта, гэта першае. І ў падтрымку вылучэньня кандыдатам на прэзыдэнта Мілінкевіча сабрана амаль 200 тысяч подпісаў”.

Падчас галасаваньня тры сябры ЦВК выказаліся супраць рэгістрацыі Мілінкевіча, дзевяць — за. Астатнія кандыдаты былі зарэгістраваныя аднагалосна.

Кожны кандыдат атрымаў пяць хвілінаў для прамовы. Пры гэтым А.Мілінкевіч і А.Казулін востра крытыкавалі палітыку А.Лукашэнкі, казалі пра рэпрэсіі, няроўныя ўмовы кампаніі, а Сяргей Гайдукевіч спрабаваў спыніць выступоўцаў падчас найбольш крытычных заяваў. Лідзія Ярмошына нагадала Мілінкевічу і Казуліну пра асаблівую адказнасьць кандыдатаў за свае словы і адказнасьць за паклёп. А выступ А.Казуліна яна назвала злоўжываньнем правам і адсутнасьцю палітычнай і чалавечай культуры.

Аляксандар Лукашэнка ніяк не адрэагаваў на крытыку на свой адрас — у сваёй жа прамове гаварыў пра захаваньне стабільнасьці ў грамадзтве і законнасьць выбарчага працэсу. Сяргей Гайдукевіч падзякаваў сваім прыхільнікам у Беларусі і Расеі. А.Лукашэнка наўпрост падзякаваў кіраўнікам Цэнтравыбаркаму Л.Ярмошынай і М.Лазавіку за “бескампраміснасьць у адстойваньні інтарэсаў краіны, адстойваньні міру і спакою”. Ён павіншаваў усіх кандыдатаў, але руку паціснуў толькі Гайдукевічу. Мілінкевіч і Казулін абмяняліся віншаваньнямі і поціскамі рук.

Падрабязна пра першыя праграмныя заявы ўсіх кандыдатаў на прэзыдэнта далей у нашым эфіры.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG