Лінкі ўнівэрсальнага доступу

"Яны ўсе крычалі, што Лукашэнка быў, ёсьць і будзе"


Радыё Свабода У Салігорску камісія па справах непаўнагадовых сёньня вынесла папярэджаньне бацькам 15-гадовага актывіста моладзевага дэмакратычнага руху Івану Шылу за няправільнае, як лічаць улады, выхаваньне.

Камісія на сваім паседжаньні разглядала паводзіны Івана Шылы, які ў сьнежні быў затрыманы ў Салігорску за налепку:

(Іван Шыла: ) “Спачатку мне задалі пытаньне, дзе я ўзяў гэтыя налепкі, якія я нібыта ляпіў па горадзе. А я кажу: “Якія налепкі? Там была толькі адна. Налепка “Твая свабода”. Яны пачалі крычаць, што ў мяне дрэнны слых і г.д.

Вялікі псыхалягічны ціск, калі ты стаіш, адказваеш на пытаньні, як ты лічыш, а на цябе можа дзесяць чалавек пачынаюць глядзець такімі вачыма, ківаць галовамі, маўляў які ты дрэнны, паводзіш сябе неадэкватна. Мой бацька хацеў сказаць, каб яны цішэй казалі і на мяне нічога дрэннага не казалі, дык яны яму слова не давалі”.

Зазначыў Іван Шыла, які вучыцца ў дзевятай клясе адной з салігорскіх школ. Абураны быў сёньняшнім разглядам і яго бацька Ўладзімір Шыла:

(Уладзімер Шыла: ) “Пратакол складалі на мяне, што я нібыта не выхоўваю сына. Там была такая маналітнасьць, мяне пяць жанчын зь міліцыянтам выцягвалі з гэтага пакою. Таму што я сказаў, што я проста хачу выказаць сваю думку. Яны ўсе крычалі, каб я закрыў рот, і што Лукашэнка “быў, ёсьць і будзе”. Я пытаюся: “Чаму вы прычапіліся да гэтага Вані?” Мне кажуць: “Таму што ён прыляпіў апазыцыйную налепку”.

Зазначыў бацька моладзевага актывіста.

У камісіі па справах непаўнагадовых не адмаўляюць “нявыхаванасьці” Івана Шылы і, абураюцца яго паводзінамі. Гаворыць намесьніца старшыні камісіі Жана Карпец:

(Карпец: ) “Хай сабе налепкі на лоб клеіць альбо яшчэ куды-небудзь!”

Паводле спадарыні Карпец, бацьку вынесена вуснае папярэджаньне аб недапушчальнасьці ў далейшым падобных дзеяньняў з боку сына. Падзеі вакол Івана Шылы атрымалі розгалас у асяродзьдзі дарослых актывістаў дэмакратычнага руху Салігорску. Вось якім меркаваньнем падзяліўся лідэр мясцовай суполкі Кансэрватыўна-хрысьціянскай партыі БНФ Алег Борын:

(Борын: ) “Інтэлігентны хлопчык, з інтэлігентнай сям’і. Вельмі разумны чалавечак. На яго ўзрост розуму вельмі шмат. Вельмі актыўны чалавек. Хвалюецца за Беларусь, за будучыню Беларусі”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG