Лінкі ўнівэрсальнага доступу

Сёньня завяршаецца чарговы этап выбарчай кампаніі


Радыё Свабода Згодна з каляндарным плянам, не пазьней за 17 студзеня павінны быць створаныя ўчасткі для галасаваньня. На іх будуць працаваць участковыя камісіі.

Выбарчае заканадаўства дазваляе фармаваць участковыя камісіі чатыром суб’ектам: палітычным партыям, грамадзкім арганізацыям, працоўным калектывам, а таксама грамадзянам. У выбарчых дакумэнтах нідзе не гаворыцца, што хтосьці з гэтых суб''ектаў мае перавагу над іншымі. Але ж практыка сьведчыць, што роўнасьці тут няма. Вось канкрэтныя лічбы: на прэзыдэнцкіх выбарах, якія праводзіліся ў 2001 годзе, аж 90% сябраў участковых камісіяў прыпадалп на прадстаўнікоў працоўных калектываў ды грамадзянаў, якія вылучаліся праз збор подпісаў. І толькі 10% былі вылучэнцамі палітычных партыяў (ад левых да правых уключна) і грамадзкіх арганізацыяў.

Дарэчы, мінімальная колькасьць працуючых на прадпрыемстве для вылучэньня – 10 асобаў. Столькі ж подпісаў патэнцыйных выбарцаў патрэбна сабраць, каб вылучацца праз збор подпісаў. І яшчэ адна цікавая лічба – на папярэдніх прэзыдэнцкіх выбарах было створана 6753 участковыя камісіі. Ці будзе цяпер розьніца параўнальна з мінулымі выбарамі? Вось як адказвае на гэтае пытаньне супрацоўніца Цэнтральнай выбарчай камісіі Надзея Кісялёва:

(Кісялёва: ) "Яна неістотная. Розьніца, канешне, будзе. Дзесьці аб''ядналі раёны і гарады, дзесьці зьмянілася тэрытарыяльна-адміністратыўны падзел, дзесьці пабудавалі новы дом. Можа нешта і зьменіцца. Але ж гэта неістотна".

І партыі, і грамадзкія арганізацыі хацелі б мець шырокае прадстаўніцтва ва ўчастковых камісіях. І пэўныя захады для гэтага яны робяць. Але калі зыходзіць зь лічбаў, якія называюць у палітычных партыях, дык, праўдападобна, што іхнае прадстаўніцтва наўрад ці пабольшыцца параўнальна з выбарамі 2001 году. Вось, прыкладам, як ацэньвае сытуацыю адзін з лідэраў Беларускай сацыял-дэмакратычнай партыі (Грамада) Уладзімер Нісьцюк:

(Нісьцюк: ) "Ва ўчастковыя камісіі мы будзем вылучаць выбарачна, таму што іх вельмі шмат. І мы будзем вылучаць толькі ў тыя камісіі, дзе нашы актывісты ўжо працавалі зь людзьмі, дзе існуюць апорныя кропкі. Я думаю, што наша партыя зможа дзесьці вылучыць пад 150-200 асобаў як мінімум. Мы ставім за мэту разам з нашымі паплечнікамі, зь якімі мы працуем у выбарчай кампаніі, паспрабаваць выставіць больш як за паўтысячы чалавек".

(Карэспандэнт: ) "Пад паплечнікамі маюцца на ўвазе грамадзкія арганізацыі?"

(Нісьцюк: ) "Так, і грамадзкія арганізацыі, і вылучэньне праз збор подпісаў. Усе мэханізмы будзем выкарыстоўваць. Акрамя, канешне, вылучэньня ад працоўных калектываў. Таму што там ніхто прадстаўнікоў апазыцыйных палітычных партыяў вылучаць ня будзе".
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG