Лінкі ўнівэрсальнага доступу

Былы спэцназавец запісаў размову зь міністрам Навумавым наконт Казуліна


Алег Грузьдзіловіч, Менск У інтэрнэце зьявіліся вытрымкі з гутаркі міністра ўнутраных спраў Уладзімера Навумава з былым спэцназаўцам Ігарам Макарам, які ўцёк у Нямеччыну пасьля апошніх прэзыдэнцкіх выбараў. Вытрымкі з размовы паказваюць, што арышт Аляксандра Казуліна ў сакавіку 2006 году быў заплянаваны значна раней.

Вытрымкі з размовы міністра Ўладзімера Навумава з былым “алмазаўцам” Ігарам Макарам зьмясьціў у інтэрнэце былы начальнік менскага сьледчага ізалятара Алег Алкаеў, які ужо некалькі гадоў жыве ў Нямеччыне. Алег Алкаеў піша, што запіс размовы яму даў сам Ігар Макар, які ўцёк у гэтую краіну пасьля леташніх прэзыдэнцкіх выбараў.

Паводле Ігара Макара, ягоная размова з Уладзімерам Навумавым адбылася ў пачатку сакавіка 2006-га году. У той час Ігар Макар, які раней звольніўся з “Алмазу”, працаваў у ахове кандыдата на прэзыдэнта Аляксандра Казуліна. Міністар Навумаў нібыта хацеў завэрбаваць ахоўніка, казаў, што Казулін патрапіць у турму і гэтага не пазьбегне Ігар Макар, калі ня пойдзе ад Казуліна. Вось цытата са стужкі:
“Наступны будзеш ты... Яго ня будзе, а ты будзеш, як адрынуты...”
“Наступны будзеш ты... Ведаеш, калі чалавек займаецца ціха бізнэсам недзе... тады яго ... А калі нават ня будуць чапаць паводле крымінальнага артыкулу... Усё роўна... Яго ня будзе, а ты будзеш, як адрынуты...”

А.Волчак: я прыклаў запіс да скаргі ў пракуратуру

Ці сапраўды гэта казаў міністра Уладзімер Навумаў?

У прэсавай службе міністэрства ўнутраных спраў сказалі, што камэнтар міністра да зьяўленьня гэтага запісу там невядомы. “Калі я зь ім убачуся, то задам гэтае пытаньне”, – паабяцала кіраўніца прэсавай службы Кацярына Самусенкава-Шэлегава.

Праваабаронца Алег Волчак заявіў “Свабодзе”, што на стужцы гучыць голас Уладзімера Навумава. Алег Волчак кажа, што чуў запіс размовы былога спэцназаўца зь міністрам некалькі месяцаў таму.
А.Волчак: “Фактычна, Навумаў прызнаецца і кажа, што рана ці позна Казулін будзе сядзець”.
“Я ня толькі яго чуў, але і прыклаў да скаргі ў пракуратуру горада адносна зьбіцьця Казуліна спэцназаўцамі. Фактычна, Навумаў прызнаецца і кажа, што рана ці позна Казулін будзе сядзець. Голас Навумава гэта пацьвярджае, і трэба заводзіць справу супроць Навумава за арганізацыю перасьледу Казуліна і тое, што яму перашкаджалі на выбарах”.

На скаргі Алега Волчака ў пракуратуру Менска адказалі, што няма падстаў для завядзеньня крымінальных спраў супроць спэцназаўцаў, якія зьбівалі Аляксандра Казуліна. Адносна ролі ў гэтай гісторыі міністра Навумава ў адказах пракуратуры ўвогуле нічога няма. Паводле прэсавага сакратара менскай пракуратуры Алега Агафонава, пракуратура тут ні пры чым.

“Скажам так: калі прысуд Казуліну вынесены судом, а потым Вярхоўны суд адхіліў скаргу, то пры чым тут менская пракуратура?”

І.Макар у Нямеччыне асьцерагаецца помсты беларускіх спэцслужбаў

Пагутарыць з былым спэцназаўцам Ігарам Макарам пакуль не ўдалося – паводле Алега Волчака, які бачыўся з Макарам у Нямеччыне, той асьцерагаецца помсты беларускіх спэцслужбаў і абмежаваў свае кантакты.

Алег Волчак нагадаў, што Ігар Макар быў гатовы выступіць сьведкам на працэсе над Аляксандрам Казуліным. Гэта было дакладна год таму. Былы спэцназавец хацеў распавесьці пра сваю размову з Уладзімерам Навумавым, каб даказаць суду, што супроць Аляксандра Казуліна рыхтавалася спэцапэрацыя. Але судзьдзя Маскоўскага суду Менска Аляксей Рыбакоў адмовіўся выклікаць у суд Ігара Макара ў якасьці сьведкі. Празь некалькі месяцаў Ігар Макар уцёк у Нямеччыну, дзе атрымаў палітычны прытулак.

А.Алкаеў, “Тайнае робіцца яўным”, “Беларускі партызан”, 09.07.2007 Казулін перадаў на волю тэкст свайго апошняга слова, 20.07.2006 Казулін шосты раз спрабаваў адвесьці судзьдзю Рыбакова, 12.07.2006
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG