Карэспандэнт: “Чаму 3 ліпеня — Дзень Незалежнасьці?”
Юнакі: “Па-мойму, пасьля прыняцьця Канстытуцыі. Яна была прынятая 3-га чысла... У сакавіку... 25 сакавіка”.
Карэспандэнт: “А калі Рэспубліка Беларусь стала незалежнай?”
Юнак: “У 1946-м”.
Пэнсіянэрка: “3 ліпеня — Дзень вызваленьня Менску. Беларусь сталася незалежнай, пэўна, у 1991-м пасьля развалу СССР. Мне так падаецца...”
Дзяўчына: “3 ліпеня вызвалілі Менск”.
Хлопец: “Беларусь стала незалежнай у 1991-м”.
Спадар: “Беларусь не тады, у 1991-м, стала незалежнай, а тады, калі яе нашы бацькі й дзяды вызвалілі. Беларусь магла быць і да сёньня пад прыгнётам. Учора Беларусь стала незалежнай ад СССР, заўтра ад СНД... І ўся гэтая незалежнасьць будзе мяняцца”.
Хлопец: “Чаму 3 ліпеня? Так вырашылі недзе... Абгрунтоўваецца вядома як. Няма варыянтаў ужо”.
Карэспандэнт: “Вы прыйшлі зь дзяржаўным чырвона-зялёным сьцяжком”.
Хлопец: “Гэта для маскіроўкі”. (Cьмяецца.)
Спадар: “Няма такога сьвята 3 ліпеня. Рэч у тым, што 3 ліпеня 1655 году расейскія войскі захапілі Менск. Што сьвяткаваць, калі палова Беларусі ў гэты дзень у 1944-м знаходзілася пад акупацыяй?”
Карэспандэнт: “Які б вы дзень абралі як Дзень Незалежнасьці?”
Спадар: “25 сакавіка”.
Хлопец: “Сёньня дзень вызваленьня Менску ад нямецка-фашысцкіх захопнікаў”.
Карэспандэнт: “Які дзень пасуе да Дня Незалежнасьці?”
Хлопец: “На гэтае пытаньне я дакладна не адкажу”.