Лінкі ўнівэрсальнага доступу

Магілёў: другі дзень страйку донараў, першыя вынікі


Радыё Свабода Сёньня другі дзень страйку магілёўскіх донараў. Ягоныя ініцыятары падводзяць папярэднія вынікі акцыі пратэсту.

Паводле аднаго з ініцыятараў, Ігара Каваленкі, у Магілёве страйкуюць каля 250 донараў. Акцыю пратэсту падтрымліваюць донары зь Менску, Гомельшчыны ды Берасьцейшчыны. Усяго страйкуюць каля васьмісот донараў.

“Першы і другі дзень страйку паказаў, што правялі ня дужа эфэктыўнае інфармаваньне донараў. Гарадзкія і дзяржаўныя сродкі масавай інфармацыі ня хочуць выносіць гэтай праблемы на ўсеагульны агляд. Памылкі, хібы безумоўна ёсьць. Папярэдні страйк будзе працягвацца ў тым выглядзе, у якім ён ёсьць. На будучыню, у ліпені, мы створым каардынацыйную рэспубліканскую раду — і больш сур’ёзна”.

Ігар Каваленка разам з хібамі ў падрыхтоўцы страйку кажа і пра ягоныя дасягненьні.
І.Каваленка: “Калі б мы не распачалі страйку, то ні міністар працы, ні міністар аховы здароўя ніколі адкрыта б не заявілі пра тое, што донары пазбаўляюцца льготаў”.
“Калі б мы не распачалі страйку, калі б не праводзілі арганізацыйнай работы да страйку, то ні міністар працы, ні міністар аховы здароўя ніколі адкрыта б не заявілі пра тое, што донары пазбаўляюцца льготаў. А так донары проста былі б пастаўленыя перад фактам”.

Донары будуць працягваць бараніць свае правы. Ужо падрыхтаваны статут донарскай грамадзкай арганізацыі.

Неўзабаве донары пададуць заяву ва ўправу юстыцыі на рэгістрацыю гэтай арганізацыі, кажа Ігар Каваленка:

“Гэта будзе грамадзкае аб’яднаньне “Кропля жыцьця”, ці гэта будзе фонд дапамогі донарам крыві й плязмы. Мы не адыходзім ад сваіх мэтаў і патрабаваньняў. Мы будзем працягваць змаганьне з чыноўніцкім апаратам за свае правы”.

Донары неахвотна камэнтуюць сваё стаўленьне да страйку. Збольшага падкрэсьліваюць, што ўдзельнічаюць на знак салідарнасьці.

Вось характэрнае меркаваньне маладой донаркі, якая здае кроў каля году — і будзе здаваць, калі льготы скасуюць:

“Я наагул не разумею, як можна забіраць у людзей ільготы. Я лічу, што гэта няправільна і несправядліва — адбіраць ільготы ў донараў. Я думаю, што ўсё будзе выдатна. Як у нас ільготы былі, так і застануцца”.

На магілёўскай станцыі пераліваньня крыві паведамілі “Свабодзе”, што ў зьвязку з абвешчаным страйкам донараў, праблемаў з здачай крыві ў іх пакуль няма. За два дні кроў здалі больш за пяцьдзясят чалавек, што адпавядае звычайнаму рэжыму працы станцыі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG