Лінкі ўнівэрсальнага доступу

У Менску прайшоў фэстываль “Дударскі фэст”


Севярын Квяткоўскі, Менск Фэстываль “Дударскі фэст” завяршыўся ў Менску ўвечары 22 красавіка. У імпрэзе ўзялі ўдзел каля сарака выканаўцаў зь Беларусі, а таксама замежныя госьці. Музыку дуды прадстаўлялі гурты "Стары Ольса", "Келіх кола", "Капэля Алеся Лася", "Ліцьвінтроль", "Ліцьвінскі хмель" ды іншыя.

Пярлінай фэсту назвалі выступ Ютакі Бана – японца, які жыве ў Баўгарыі, і грае на баўгарскім тыпу дуды. На фэсьце апроч беларускіх былі прадстаўленыя таксама польскія, літоўскія, латыскія, галісійскія, нямецкія і шатляндзкія дуды.

Гаворыць арганізатар і вядоўца імпрэзы – Зьміцер Сасноўскі, лідэр гурту “Стары Ольса”.

“На нашым фэстывалі мы б хацелі, каб гучалі вельмі розныя дуды, і дэманстравалі, што традыцыя беларускай дуды разьвівалася сярод інструмэнтаў такога ж кшталту інструмэнтаў усёй Эўропы. У рэканструкцыі традыцыйнай беларускай манэры граньня вельмі моцна вылучаюцца два вучні майстра Тодара Кашкурэвіча: Дзяніс Сухі і Юрась Панкевіч”.

Сучасных беларускіх дудароў можна падзяліць на дзьве катэгорыі. Першыя – тыя, хто займаецца рэканструкцыяй аўтэнтычнага гучаньня дуды, і тыя музыканты, якія выкарыстоўваюць гук дуды як элемэнт музычнага аздабленьня сваіх песень. Яшчэ пятнаццаць гадоў таму ў Беларусі было адно некалькі дудароў, які аднаўлялі амаль што згубленую традыцыю майстраваньня ды ігры на старадаўнім інструмэнце: напрыклад, Алесь Лось і Тодар Кашкурэвіч. Цяпер зьявіўся цэлы дударскі рух.

За сцэнай вялікая грымёрка, выканаўцы рыхтуюцца да выступу, шмат моладзі, я зьвяртаюся да аднаго з удзельнікаў. Аляксей Барэйша, малады гурт “Яварына”:

“Гадоў пяць таму я яшчэ ня ведаў, што дуда – беларускі інструмэнт. Калі я апынуўся ва ўнівэрсытэце культуры, пазнаёміўся з дудой. Я так ацаніў, што ў Беларусі вельмі вялікі інтарэс да гэтага інструмэнту”.

Некаторыя з гледачоў дзеляцца ўражаньнямі ад імпрэзы:

“Гэтая музыка ўздымае настрой. Калі граюць старажытную музыку, беларускую ці агульнаэўрапейскую, заўжды сыходжу з усьмешкай, вельмі рады”.

“Вельмі добра, што ў нас гэта ёсьць, яно будзе, мусіць быць. Мы мусім ведаць нашу культуру і мову”.

Зьміцер Сасноўскі так падсумаваў вынікі фэсту:

“Я вельмі крытычна стаўлюся да ўсіх нашых посьпехаў, больш бачу недахопы. Але можна сказаць, што зьявілася традыцыя штогадовых фэстаў дуды, і вяртаньне гэтага нацыянальнага інструмэнту адбылося”.

Фэстываль скончыўся выхадам усіх музыкаў, што граюць на беларускіх дудах, якія выканалі найгрыш “Зайграй мне, дударочку”, што стаўся гімнам “Дударскага фэсту”.



Выступае японскі дудар Ютка Бан.



Выступае Капэла Велькапольскіх дудароў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG