Лінкі ўнівэрсальнага доступу

VoxPopuli: Гарадзенцы — пра зьмены ў Канстытуцыі


Радыё Свабода, Горадня Трынаццаць гадоў таму, 15 сакавіка 1994 году, была прынятая Канстытуцыя Рэспублікі Беларусь. Пасьля гэтага яна была двойчы перагледжаная — у 1996 і 2004 гадах. Што б вы прапанавалі зьмяніць у асноўным законе краіны, што вас у ім не задавальняе?

Слухаць:

Спадар: “Зразумела, што ў Канстытуцыі задавальняе ня ўсё. Улада — яна ёсьць улада, яна й псуе чалавека, зразумела. Таму, каб былі якіясьці зьмены ў краіне, патрэбная зьмена прэзыдэнта”.

Спадар: “Калі гэта асноўны закон, дык і падпарадкавацца яму павінны ўсе, той жа самы прэзыдэнт, а не мяняць яе пад сябе. У Амэрыцы прынялі Канстытуцыю дзьвесьце зь лішкам гадоў таму, так яна й засталася, толькі некалькі паправак зрабілі невялікіх. А ў нас Канстытуцыя — што ёсьць, што яе няма, бо калі яна некага не задавальняе, то ўзяў ды памяняў. А мяняе адзін толькі чалавек, ад астатніх нічога не залежыць у гэтым сэнсе, ад мяне таксама”.

Малады спадар: “Калі запісана ў Канстытуцыі, што можна балятавацца на прэзыдэнцкую пасаду два разы — значыць, усё, і нельга мяняць Канстытуцыю, бо атрымліваецца цяпер, што пажыцьцёва, што цар”.

Ягоны сябра: “Не, Канстытуцыя — гэта аснова, дакумэнт, які зацьверджаны раз і назаўсёды. Папросту ўладу трэба разьмеркаваць правільна: не засяроджваць яе ў руках прэзыдэнта, а даць магчымасьць дэпутатам вырашаць пытаньні. А ў нас улада — цалкам і поўнасьцю ў адных руках”.

Спадар: “Канстытуцыю неабходна было б вярнуць назад — першапачатковую, Лукашэнка яе нахабна парушыў. Гэта цяжкае пытаньне, але я лічу ўсё-такі, што, каб у нас была парлямэнцкая рэспубліка, было б лепей. Менавіта: не прэзыдэнцкая, а парлямэнцкая”.

Малады спадар: “Я лічу, што ўсё ж ня варта было зьмяняць Канстытуцыю, бо ў ёй зафіксаваныя не хвілёвыя нормы, а Канстытуцыя — гэта пастаянны дакумэнт. У Амэрыцы ўвогуле — дзьвесьце гадоў яна існуе, і нічога не зьмяняецца. Нам, напэўна, таксама трэба быць больш стабільнымі ў гэтым пляне”.

Спадар: “Ва ўсім сьвеце інакш, чым у нас. Я вось цяпер гляджу тэлевізар: прэзыдэнт Францыі адмовіўся балятавацца на трэці тэрмін. Значыць, так і павінна быць, бо так у большасьці краінаў. Чаму ў нас павінна быць інакш? Трэба рухацца наперад крышачку”.

Спадар: “Шчыра кажучы, на дадзены момант я б нічога не зьмяняў у Канстытуцыі”.

Сталы спадар: “Перамены патрэбныя, нейкі застой у нас. Ну глядзіце: колькі мяняецца ўрад, але нічога ня робіцца, наперад не ідзе. Дык што гэта за Канстытуцыя, каго яна абараняе?”
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG