Лінкі ўнівэрсальнага доступу

Міраслаў Дэмбіньскі: гэта ўзнагароды ня фільму, але беларускай справе


Сяргей Абламейка, Прага Ад 1 да 8 сакавіка ў Празе адбываецца Міжнародны фэстываль дакумэнтальных фільмаў праваабарончай тэматыкі. Фільм польскага рэжысэра Міраслава Дэмбіньскага “Урок беларускай мовы” атрымаў на ім два прызы. Адзін з гэтых прызоў штогод прысуджае адмысловае журы пад ганаровым кіраўніцтвам Вацлава Гаўла – за фільм, які ўносіць надзвычайны ўклад у справу абароны правоў чалавека. Другі прыз – за лепшы фільм у намінацыі “Наступнае пакаленьне Эўразьвязу” прысуджае студэнцкае журы фэстывалю. Сёньня, у апошні дзень фэстывалю, Міраслаў Дэмбіньскі даў Беларускай службе Радыё Свабода эксклюзіўнае інтэрвію.

Дэмбіньскі: Гэтыя дзьве ўзнагароды вельмі важныя. Мне прыемна, што фільм, які я зрабіў, быў узнагароджаны. Але я ўспрымаю гэта ня як узнагароды фільму, але як узнагароды той справе, якую я хацеў паказаць у сваім фільме. Справа Беларусі вельмі важная і вельмі актуальная і трэба прыкласьці шмат высілкаў, каб Беларусь і яе праблему прапагандаваць як найшырэй. І гэтыя ўзнагароды, і гэты фэстываль важныя для мяне таму, што яны зьвяртаюць увагу на беларускія праблемы. Дзеля гэтага я стараюся паказваць гэты фільм як мага шырэй – наколькі гэта магчыма. Tут, у Заходняй Эўропе гэты фільм быў ужо шмат разоў паказаны на розных фэстывалях. Але для мяне таксама важна, каб гэты фільм трапіў і ў Беларусь, каб ён прарваў тую прапагандысцкую лукашэнкаўскую бурбалку. Мы зрабілі 4000 дыскаў, якія цяпер распаўсюджваюцца ў Беларусі. Так што я стараюся праз гэты фільм як мага шырэй паказаць беларускую праблему.

Цалкам інтэрвію зь Міраславам Дэмбіньскім зьявіцца ў нашым эфіры і на сайце пазьней.

Нагадаем, у сваім фільме “Урок беларускай мовы” Міраслаў Дэмбіньскі спалучае гутаркі з маладымі людзьмі пра сёньняшні і заўтрашні дзень Беларусі з кадрамі леташняй прэзыдэнцкай выбарчай кампаніі.

Урывак зь фільму на сайце кінафэстывалю Jeden Svět

Фільм цалкам на сайце wolnabialorus.org
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG