Лінкі ўнівэрсальнага доступу

За цукровым крызысам набліжаецца мясны


Радыё Свабода На 18,3% павялічыліся ад пачатку года запасы гатовай прадукцыі на беларускіх прадпрыемствах. У фактычных цэнах запасы склалі амаль паўтара мільярда даляраў ЗША. Чаму беларуская прамысловасьць працуе на склад?

Запасы гадзіньнікаў на складах, да прыкладу, у 21 раз перавышаюць сярэднямесячны аб’ём вытворчасьці, тканін – у 4,5 разы. Запасы калготак, шкарпэтак на складах – 252% сярэднемесячнага аб’ёму, абутку – 204%, тэлевізараў – 180%.

Эканаміст, кіраўнік аналітычнага цэнтру Мізэса Яраслаў Раманчук паставіў такі дыягназ.

Раманчук: “Лёгкая прамысловасьць лягла першай, гэта акурат тая сытуацыя, калі прадпрыемствы яшчэ савецкага ўзору ўвогуле не прыстасаваныя да каньюнктуры рынку”.

Найбольшыя суадносіны запасаў гатовай прадукцыі і сярэднемесячнага аб’ёму вытворчасьці склаліся ў лёгкай прамысловасьці – 128,3%, у харчовай – амаль 89%. Менавіта ў гэтых галінах больш за ўсё стратных прадпрыемстваў – амаль траціна.

Меркаваньне эканаміста Міхала Залескага.

Залескі: “Так арганізаваная сацыялістычная наша эканоміка, што на працягу году сярэднегадавыя запасы складаюць прыкладна 50 – 60% месячнага выпуску. Яны могуць перавышаць па асобных прадпрыемствах у многія разы месячны выпуск прадукцыі. Гэта зьвязана з тым, яшчэ раз падкрэсьліваю, што эканоміка застаецца савецкай. І там, дзе ва ўсім сьвеце разумеюць, што галоўнае – гэта не зрабіць, а прадаць, у нас патрабуюць камсамольскае “давай-давай”: “Удвая, утрая вышэй за норму”. А каму гэтыя гадзіньнікі патрэбныя, ніхто не пытаецца. Вось і атрымліваем вынікі”.

Ці ёсьць выйсьце з гэтай сытуацыі?

Раманчук: “Спадар Нарышкін, які кіруе “Беллегпрамам”, замест таго, каб канцэпцыю прыватызацыі, мадэрнізацыі лёгкай прамысловасьці краіны зрабіць, пайшоў ужо па знаным намэнклятурным сцэнары: спатачку “пазбавімся ад індывідуальных прадпрымальнікаў”. Потым яны забясьпечылі сабе ільготы, крэдыты. Потым падышоў такі тэмат імпартазамяшчэньня “Купляйце беларускае”. Усё адно гэта не дапаможа. Нават калі ўрад і будзе датаваць электраэнэргію для гэтага сэктару эканомікі, усё адно ён ня ў стане канкураваць ні з расейскімі, ні з украінскімі, ні зь нямецкімі, швэдзкімі альбо кітайскім прадпрымальнікамі”.

А зараз узьніклі праблемы са збытам у прадпрыемстваў харчовай прамысловасьці.За цукровым крызысам набліжаецца мясны. У лядоўнях Менскага мясакамбінату назапасіўся месячны аб’ём гатовай прадукцыі, якая павінна была пайсьці на экспарт, падобныя праблемы на Слуцкім мясакамбінаце.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG