13 лістапада падчас сустрэчы з прэм’ер-міністрам Армэніі Ніколам Пашынянам Ціханоўская падзякавала яму за тое, што Армэнія не выдае беларускіх грамадзян на запыты рэжыму Лукашэнкі.
На сустрэчы з прэзыдэнтам Кіпру Нікасам Хрыстадулідзісам беларуская дэмакратычная лідэрка Сьвятлана Ціханоўская дамовілася пра візыт у краіну.
«Таксама вярнуліся да пытаньняў, якія абмяркоўвалі падчас папярэдняй сустрэчы ў 2024 годзе. У прыватнасьці, гаварылі аб выдачы пашпартоў іншаземца беларусам, якія праз рэпрэсіі ня могуць вярнуцца ў Беларусь і замяніць пашпарт», — адзначаецца ў паведамленьні прэс-службы Ціханоўскай.
Сьвятлана Ціханоўская падзякавала прэм’ер-міністру Чэхіі Андрэю Бабішу за візавыя паслабленьні для сваякоў беларусаў, паведаміла ейная прэс-служба.
🛈 Амбасада Чэхіі ў Менску 10 лістапада пачала прымаць праз электронную пошту заяўкі на запіс для падачы дакумэнтаў на кароткатэрміновую шэнгенскую візу для наведваньня сваякоў. Падаць дакумэнты змогуць бацькі, бабулі, дзядулі, дзеці і ўнукі грамадзян Чэхіі, а таксама беларусаў, якія жывуць у гэтай краіне па доўгатэрміновай візе або маюць дазвол на доўгатэрміновае ці пастаяннае пражываньне. На братоў і сясьцёр, у тым ліку стрыечных, а таксама на дзядзькаў і цётак новыя правілы не распаўсюджваюцца, нагадвае «Позірк».
З прэм’ер-міністрам Эстоніі Крыстэнам Міхалам Ціханоўская абмеркавала магчымы ўдзел беларускіх дэмсілаў у канфэрэнцыі па аднаўленьні Ўкраіны, заплянаванай на студзень у Таліне.
Прэм’ер-міністра Латвіі Андрыса Кулбэргса Сьвятлана Ціханоўская заклікала не закрываць мяжу для звычайных беларусаў, нягледзячы на неабходнасьць ізаляцыі рэжыму ў Менску. Ціханоўская таксама выказала салідарнасьць зь Латвіяй у сувязі зь гібрыднымі атакамі і міграцыйным ціскам, адказнасьць за якія ўсклала на рэжым Лукашэнкі і Расею.
Генэральнага сакратара АБСЭ Фэрыдуна Сінірліёглу Ціханоўская заклікала дамагацца вызваленьня палітвязьняў, спыненьня рэпрэсіяў і вайны Расеі супраць Украіны падчас кантактаў зь беларускімі ўладамі.
Сінірліёглу наведаў Менск 3–4 лістапада. Ён сустрэўся з Аляксандрам Лукашэнкам і міністрам замежных спраў Максімам Рыжанковым.
На палях саміту Эўрапейскай палітычнай супольнасьці ў Дубліне, які прайшоў 12–13 лістапада, Сьвятлана Ціханоўская правяла дзясяткі сустрэчаў. У фотасправаздачы пра ўдзел Ціханоўскай у саміце ёсьць ейныя фота з 33 высокапастаўленымі палітыкамі:
- прэм’ер-міністрам Армэніі Ніколам Пашыньянам;
- міністрам замежных спраў Армэніі Араратам Мірзаянам;
- прэм’ер-міністрам Баўгарыі Руменам Радзевым;
- прэм’ер-міністрам Вялікабрытаніі Эндзі Бэрнэмам;
- прэм’ер-міністрам Вугоршчыны Петэрам Мадзярам;
- прэм’ер-міністрам Грэцыі Кірыякасам Міцатакісам;
- прэм’ер-міністрам Грузіі Іракліем Кабахідзэ;
- міністаркай замежных спраў Грузіі Макай Бачарышвілі;
- прэм’ер-міністрам Ірляндыі Міхолам Марцінам;
- былой міністаркай замежных спраў Ісьляндыі Тордзіс Колбрун Рэйкф’ёрд Гільфадоўцір;
- прэм’ер-міністаркай Італіі Джорджай Мэлёні;
- прэм’ер-міністрам Канады Маркам Карні;
- прэзыдэнтам Кіпру Нікасам Хрыстадулідзісам;
- прэм’ер-міністрам Косава Альбінам Курці;
- прэм’ер-міністрам Латвіі Андрысам Кулбэргсам;
- прэзыдэнтам Літвы Гітанасам Наўседам;
- прэзыдэнткай Малдовы Маяй Санду;
- канцлерам Нямеччыны Фрыдрыхам Мэрцам;
- прэм’ер-міністрам Польшчы Дональдам Тускам;
- прэзыдэнтам Румыніі Нікушорам Данам;
- прэм’ер-міністрам Славеніі Янэзам Яншам;
- прэзыдэнтам Украіны Ўладзімірам Зяленскім;
- прэм’ер-міністрам Фінляндыі Пэтэры Орпа;
- прэм’ер-міністрам Харватыі Андрэем Пленкавічам;
- прэм’ер-міністрам Чэхіі Андрэем Бабішам;
- прэм’ер-міністрам Швэцыі Ульфам Крыстэрсанам;
- прэм’ер-міністрам Эстоніі Крыстэнам Міхалам;
- старшынём Эўрапейскай рады Антонію Коштам;
- старшынёй Эўрапейскага парлямэнту Рабэртай Мэтсолай;
- генэральным сакратаром Рады Эўропы Аленам Бэрсэ;
- старшынёй Эўрапейскай камісіі Урзуляй фон дэр Ляен;
- генэральным сакратаром АБСЭ Фэрыдунам Сінірліёглу;
- генэральным сакратаром NATO Маркам Рутэ.
Падчас сустрэчаў Ціханоўская размаўляла наконт бясьпекі рэгіёну, падтрымкі Ўкраіны, вызваленьня палітвязьняў і ўзмацненьня дапамогі беларускім незалежным мэдыя, праваабаронцам, моладзі, культурным ініцыятывам і пацярпелым ад рэпрэсіяў, гаворыцца ў паведамленьні, апублікаваным у сацсетках палітыка.
Форум