На выбарах у Ізраілі лідзіруе партыя прэм’ера Нэтаньягу. Але ні ўладны блёк, ні апазыцыя не атрымалі большасьці

Паводле праекцый, якія цытуе агенцтва Reuters, блёк партый, прыхільных да цяперашняга прэм'ер-міністра Біньяміна Нэтаньягу, атрымае каля 55 месцаў у парлямэнце з 120. Апазыцыйны блок будзе мець каля 50, а яшчэ каля 15 месцаў атрымаюць арабскія партыі. Каб сфармаваць урад большасьці, трэба 61 месца ў парлямэнце.

На 10:01 падлічылі 3 775 461 бюлетэняў. Агульная колькасьць выбарнікаў складае 7 331 981.

Як вынікае з афіцыйнага сайту ЦВК, партыя «Лікуд» на чале з дзейным прэм’ерам Нэтаньягу лідзіруе з 21.05 % падтрымкі (790 994 выбарнікаў).

На другім месцы партыя «Яшар», якую ачольвае колішні начальнік Генштабу Арміі абароны Ізраілю (ЦАХАЛ) Гадзі Айзенкот — 16,15 % або 606 897 выбарнікаў.

Блёк «Аб’яднаны сьпіс» пакуль займае трэцяе месца з 9,16 % або 344 133 выбарнікаў, а на чацьвёртым — партыя «Разам» на чале з колішнім прэм’єр-міністрам краіны Нафталі Бэнэтам — 8,91 % або 334 776 выбарнікаў.

ГЛЯДЗІЦЕ ТАКСАМА:

Ураджэнец Беларусі ўзначаліў ізраільскую выведку «Масад», абяцаў працяг апэрацый супраць Ірану

Што папярэднічала і чаму гэта важна

У Ізраілі 27 кастрычніка адбылося галасаваньне на парлямэнцкіх выбарах. Яўка на выбарах стала рэкорднай з 1973 году — больш за 74%. Каля выбарчых участкаў ствараліся вялікія чэргі.

Гэта былі першыя выбары пасьля нападу радыкальных ісламістаў пад кіраўніцтвам «Хамас» (арганізацыя прызнаная тэрарыстычнай у ЗША і ЭЗ) на поўдзень Ізраілю 7 кастрычніка 2023 году і войнаў у Сэктары Газы, Ліване і ваеннага канфлікту з Іранам.

Экспэрты называюць цяперашняе галасаваньне лёсавызначальным для краіны. Выбары таксама разглядаюць як рэфэрэндум аб курсе прэм’ера Нэтаньягу і яго правай кааліцыі.

Вынікі экзытполаў, абнародаваныя пасьля закрыцьця ўчасткаў, паказалі, што першае месца займае партыя «Лікуд» (24-25 месцаў у парлямэнце), а другое — партыя «Яшар» (21-22 мандаты). Усяго ў Кнэсэце 120 дэпутацкіх месцаў.

У такім выпадку «Лікуд», які зноў стане найбольшай у парлямэнце партыяй, але страціць некалькі месцаў у параўнаньні з папярэднім скліканьнем, у якім гэтая палітычная сіла мела 32 мандаты.

Палітыка Нэтаньягу выклікала раскол у краіне і ўзмацніла міжнародную ізаляцыю Ізраіля. Аднак сам прэм’ер пазыцыянуе сябе як адзінага лідэра, які мае дастатковую цьвёрдасьць, каб супрацьстаяць ворагам Ізраілю, паведаміла агенцтва Reuters.

ГЛЯДЗІЦЕ ТАКСАМА:

Трамп заявіў пра «гістарычную дамоўленасьць» аб раззбраеньні палестынскай групоўкі ХАМАС