Сёньня ў сьвеце адзначаецца Міжнародны дзень нематэрыяльнай культурнай спадчыны. У сьпісы UNESCO ўключаныя такія беларускія аб’екты
- Бортніцтва (разам з Польшчай),
- Будслаўскі фэст,
- Выцінанка,
- Калядныя цары,
- Саломапляценьне,
- Юраўскі карагод,
- Неглюбская тэкстыльная традыцыя Веткаўскага раёну.
У беларускім інвэнтары нематэрыяльнай культурнай спадчыны — больш за паўтары сотні аб’ектаў.
Сёньня таксама
1448 — пачалася другая бітва на Косавым полі (непадалёк ад Прышціны) паміж войскамі Асманскай імпэрыі і хрысьціянскім войскам на чале з вугорскім вайскаводам Янашам Гуньядзі. Празь пяць дзён баёў асманцы перамаглі, іхная імпэрыя працягнула захоп новых земляў. Праз 5 гадоў асманы захапілі Канстантынопаль.
1777 — пад Саратогай у час Вайны за незалежнасьць ЗША капітулявала амаль шасьцітысячная брытанская армія генэрала Джона Бэргойна. Значны ўнёсак у перамогу зрабіў ураджэнец Беларусі Тадэвуш Касьцюшка, які спраектаваў умацаваньні амэрыканскага войска. Капітуляцыя пераканала Францыю заключыць саюз з амэрыканскімі паўстанцамі, што ўрэшце дапамагло ім здабыць незалежнасьць.
1961 — пачаўся XXII зьезд КПСС, які абвясьціў мэтай пабудову камуністычнага грамадзтва да 1980 году. Таксама зьезд прыняў рашэньне пра вынас цела Сталіна з маўзалея.
1961 — у нью-ёрскім Музэі сучаснага мастацтва была выстаўлена карціна Анры Матыса «Човен». Толькі 3 сьнежня нехта зьвярнуў увагу на тое, што карціна вісіць нагамі ўгору.
1962 — гурт The Beatles упершыню выступіў на брытанскай тэлевізіі — у рэгіянальнай праграме.
1964 — у Беларусі адкрылі першае прамысловае радовішча нафты. Навукоўцы кажуць, што калі б Беларусь цалкам жыла толькі за кошт свае нафты, дык выбрала б увесь запас за 30 гадоў.
1968 — пачаўся паэтапны вывад союзных войскаў з тэрыторыі Чэхаславаччыны, пры гэтым савецкія вайсковыя часткі заставаліся ў краіне да 1991 году.
1985 — у кінапракат выйшаў фільм «Ідзі і глядзі» рэжысэра Элема Клімава, зьняты паводле сцэнару, напісанага ім разам зь беларускім пісьменьнікам Алесем Адамовічам. Карціна стала адным з самых вядомых у сьвеце антываенных фільмаў.
1990 — у Купалаўскім тэатры ў Менску адбылася прэм’ера спэктаклю «Тутэйшыя» паводле п’есы Янкі Купалы, які паставіў Мікалай Пінігін. У канцы спэктаклю на сцэне ўздымаўся бел-чырвона-белы сьцяг. У 1992 годзе спэктакль атрымаў Дзяржаўную прэмію Беларусі.
1993 — упершыню адзначылі Міжнародны дзень барацьбы за ліквідацыю галечы, уведзены з ініцыятывы ААН.
1999 — у Менску прайшоў адзін з самых буйных пратэстаў супраць інтэграцыі з Расеяй, называўся ён «Марш свабоды».
У розныя моманты шэсьця колькасьць удзельнікаў вагалася ад 20 да 40 тысячаў чалавек.
Акцыя скончылася масавымі сутыкненьнямі дэманстрантаў зь міліцыяй і салдатамі ўнутраных войскаў і шматлікімі арыштамі. Каля 200 чалавек пасьля акцыі зьвярнуліся па мэдыцынскую дапамогу, а ў міліцыі завялі 62 адміністрацыйныя справы і 7 крымінальных.
2004 — у Беларусі прайшоў рэфэрэндум, вынікі якога скасавалі канстытуцыйнае абмежаваньне, якое забараняла адной асобе займаць пасаду прэзыдэнта краіны больш як два разы. Гэта дазволіла Аляксандру Лукашэнку, які кіраваў краінай з 1994 году, вылучацца кандыдатам у прэзыдэнты неабмежаваную колькасьць разоў. Назіральнікі АБСЭ адзначылі сур’ёзныя парушэньні выбарчых стандартаў.
У гэты дзень нарадзіліся
1696 — Аўгуст ІІІ Саксонскі, вялікі князь літоўскі і кароль польскі.
1785 — Тадэвуш Валянскі, польскi гісторык і археоляг, калекцыянэр.
1865 — Люцыян Жалігоўскі, генэрал, дзяржаўны і ваенны дзеяч Сярэдняй Літвы і Польшчы, вядомы «бунтам Жалігоўскага» у 1920 годзе, падчас якога захапіў Вільню, стварыў Сярэднюю Літву і далучыў яе да Польшчы.
1900 — Ібрагім Гембіцкі, беларускі мастак-графік.
1937 — Мікалай Чаргінец, беларускі генэрал і пісьменьнік, старшыня праўладнага Саюзу пісьменьнікаў Беларусі (2005–2022).
У памяці
1849 — Фрэдэрык Шапэн, польскі кампазытар і піяніст.
1976 — Радаслаў Астроўскі, палітычны і грамадзкі дзяяч, арганізатар Слуцкай беларускай гімназіі, удзельнік Слуцкага збройнага чыну, дырэктар Віленскай беларускай гімназіі. Падчас Другой сусьветнай вайны супрацоўнічаў зь нямецкімі акупацыйнымі ўладамі, у сьнежні 1943 году ўзначаліў створаную зь іхнай санкцыі Беларускую цэнтральную раду. Пахаваны на беларускіх могілках у амэрыканскім Саўт-Рывэры.
1994 — Зоя Коўш, грамадзкая дзяячка, юрыстка, мэмуарыстка, нявольніца ГУЛАГу.