Як адзначаецца ў апублікаванай справаздачы Дзяржаўнага дэпартамэнту ЗША, сёлета агулам такіх дзяржаў 12, па іх ёсьць дакумэнтальна пацьверджаная «палітыка або мадэль» гандлю людзьмі, гандлю людзьмі ў праграмах, якія фінансуюцца ўрадам, прымусовая праца ў дзяржаўных мэдычных службах або іншых сэктарах, сэксуальнае рабства ў дзяржаўных лягерах або найм ці вэрбаваньне дзяцей-салдатаў.
Гэта: Афганістан, Беларусь, М’янма, Камбоджа, Кітай, Куба, Эрытрэя, Іран, Паўночная Карэя, Расея, Паўднёвы Судан і Судан.
З сьпісу сёлета выключылі Сырыю.
Якія мэты штогадовых справаздач
Дзяржаўны дэпартамэнт ЗША публікуе справаздачу аб гандлі людзьмі з 2001 году. Стварэньне пераліку краін, датычных да гандлю людзьмі стала вынікам ухваленьня ў ЗША ў 2000 годзе фундамэнтальнага закону аб абароне ахвяр гандлю людзьмі.
Мэтай справаздачы зьяўляецца ацэнка намаганьняў замежных урадаў у барацьбе з прымусовай працай і гандлем людзьмі ў мэтах сэксуальнай эксплуатацыі, а таксама папярэджаньне краін аб наступства бязьдзеяньня.
Справаздача грунтуецца на ацэнцы трох базавых кірункаў: прафіляктыка, крымінальны перасьлед вінаватых і абарона пацярпелых.
У 2025 годзе адміністрацыя ЗША аднавіла кантакты з Аляксандрам Лукашэнкам. Перамовы вядзе Джон Коўл. Ад 10 лістапада 2025 году ён займае пасаду спэцыяльнага пасланьніка прэзыдэнта ЗША для Беларусі, а ўпершыню прыехаў на перамовы ў Менск 21 чэрвеня таго ж году.
Форум