Дзень у гісторыі
1078 — у міжусобнай бітве пад Чарнігавам загінуў Ізяслаў Яраславіч, сын Яраслава Мудрага, займаў княскія пасады ў Тураве і Кіеве. Разам з братамі ў сакавіку 1067 году біўся супраць полацкага князя Ўсяслава на Нямізе — тады ў летапісы трапіла першая згадка пра Менск. У чэрвені таго ж году Яраславічы вераломна захапілі Ўсяслава з двума сынамі і зьняволілі іх у Кіеве. Але ў 1068 годзе кіяўляне вызвалілі Ўсяслава і пасадзілі яго на кіеўскі пасад, а Ізяслаў уцёк у Польшчу. Увесну 1069 году Ізяслаў прывёў польскае войска, а Ўсяслаў вярнуўся ў Полацак.
1608 — аддзелы Яна Пятра Сапегі і Аляксандра Лісоўскага (лісоўчыкі) пачалі аблогу Тройца-Сергіевага манастыра пад Масквой (23 верасьня паводле старога стылю). Яна цягнулася да студзеня 1610 году і не дала выніку.
1615 — у выніку антыфэадальнага паўстаньня гараджанаў у Мазыры ўлада перайшла да гарадзкога магістрату.
1932 — Ірак атрымаў незалежнасьць ад брытанскага кіраваньня і ўступіў у Лігу Нацыяў Цяпер 3 кастрычніка адзначаецца ў Іраку як Нацыянальны дзень.
1952 — Вялікая Брытанія правяла першае выпрабаваньне ядзернай зброі.
1990 — адбылося юрыдычнае ўзьяднаньне Нямеччыны. Гэтаму папярэднічалі падзеньне Бэрлінскага муру 9 лістапада 1989 году, першыя свабодныя выбары ў ГДР 18 сакавіка 1990 году і падпісаньне 31 жніўня 1990 году Дамовы пра аб’яднаньне дзьвюх нямецкіх дзяржаваў. Сёньня ў Нямеччыне адзначаецца Дзень нямецкага адзінства.
2021 — выйшла «Дасье Пандоры». Міжнародны кансорцыюм журналістаў-расьсьледнікаў выкрыў афшорныя схемы сусьветных лідэраў. Гэта найбуйнейшы ў гісторыі выцек дакумэнтаў, якія засьведчылі, што ад падаткаабкладаньня былі выведзенгы трыльёны даляраў. 138 кампаніяў з дасье зьвязаныя з грамадзянамі Беларусі.
У гэты дзень нарадзіліся
1458 — Казімер Казімеравіч, сын караля польскага і вялікага князя літоўскага Казімера IV Ягайлавіча, каталіцкі сьвяты, патрон Літвы і Польшчы.
1889 — Міхал Пятроўскі, беларускі хадэцкі дзеяч, каталіцкі сьвятар.
1895 — Сяргей Ясенін, расейскі паэт.
1897 — Міхась Дуброўскі, беларускі пісьменьнік, перакладчык.
1897 — Люі Араґон, францускі пісьменьнік.
1914 — Ян Новак-Езяранскі, польскі журналіст, публіцыст, стваральнік польскай службы Радыё Свабодная Эўропа.
1922 — Міхась Наўмовіч, мастак, дзяяч беларускай эміграцыі.
1924 — Рыгор Клімовіч, дзяяч беларускага нацыянальнага супраціву, вязень ГУЛАГу, адзін зь лідэраў і аўтар гімну Нарыльскага паўстаньня.
1978 — Віктар Жыбуль, беларускі паэт і літаратуразнавец.
У памяці
1226 — Францішак Асыскі, заснавальнік ордэна францішканцаў, каталіцкі сьвяты.
1652 — Крыштап Хадкевіч, дзяржаўны дзеяч Вялікага Княства Літоўскага.
1848 — Міхал Баброўскі, славіст і арыенталіст, прафэсар Віленскага ўнівэрсытэту, уніяцкі сьвятар. Чалец Археалягічнай акадэміі ў Рыме, парыскага і лёнданскага Азіяцкіх навуковых таварыстваў, камітэту выпрацаваньня харвацкага правапісу ў Далмацыі. У 1826 годзе падчас публічнага выступу на адкрыцьці курсу славяназнаўства ў Галоўнай духоўнай сэмінарыі Віленскага ўнівэрсытэту заявіў, што афіцыйнай мовай Вялікага Княства Літоўскага і Статутаў ВКЛ была беларуская.
1937 — Павал Валошын, беларускі палітычны дзеяч.
2006 — Тамара Пузіноўская, акторка Купалаўскага тэатру.
2013 — Віктар Івашкевіч, беларускі грамадзка-палітычны дзеяч, журналіст, адзін зь лідэраў нацыянальнага адраджэнскага руху.
2014 — Рыгор Кійко, беларускі мастак, палітвязень.
2017 — 21-гадовага шарагоўца Аляксандра Коржыча знайшлі ў пятлі са зьвязанымі нагамі і надзетай на галаву майкай у склепе мэдычнай роты вайсковай часткі ў Печах пад Барысавам. Расьсьледаваньне прыйшло да высновы, што вайскоўца давялі да самагубства. У 2018 годзе Менскі абласны суд прысудзіў тром сяржантам 6, 7 і 9 гадоў зьняволеньня. Маці Коржыча з высновай пра самагубства не пагадзілася.
2023 — Надзея Артымовіч, паэтка на Падляшшы.
