Як паведаміла агенцтва Reuters, Аляксандар Вучыч ачоліць сьпіс кіроўнай Сэрбскай прагрэсіўнай партыі і стане кандыдатам у прэм’ер-міністры.
У 2027 годзе мусіў закончыцца яго другі тэрмін на пасадзе прэзыдэнта. Згодна з Канстытуцыяй краіны, адна і тая ж асоба ня можа займаць пасаду прэзыдэнта больш за два тэрміны.
Што папярэднічала
7 верасьня ўрад Сэрбіі папрасіў прэзыдэнта распусьціць Народную Скупшчыну — аднапалатны парлямэнт краіны і прызначыць новыя выбары. Аляксандар Вучыч так і зрабіў. Новыя выбары адбудуцца 25 кастрычніка.
Сэрбія — парлямэнцкая рэспубліка. Выканаўчая ўлада ў краіне належыць ураду на чале з прэм’ер-міністрам. Прэзыдэнт, аднак, таксама мае шэраг паўнамоцтваў, найперш, у сфэры вонкавай палітыкі і бясьпекі.
Прэзыдэнт, які сустракаўся і з Лукашэнкам і зь Ціханоўскай
Аляксандар Вучыч кіруе краінай з 2017 году. Ён пазыцыянуе сябе рэфарматарам, які вядзе Сэрбію ў ЭЗ, але пры гэтым захоўвае цесныя сувязі з Расеяй і Кітаем.
Вучыч таксама чатыры разы сустракаўся з Аляксандрам Лукашэнкам, у 2017 (калі быў яшчэ прэм’ер-міністрам), 2019 (двойчы)і 2024 годзе.
На апошняй сустрэчы Лукашэнка казаў Вучычу, што «старых сяброў губляць нельга», таму трэба падтрымліваць стасункі з Расеяй і Беларусьсю. «Гэта сапраўдныя сябры, глыбокія сябры, і ў гэтым кірунку, я мяркую, у Сэрбіі будуць рабіць максымум», — заявіў тады Лукашэнка.
Вучыч быў першым сярод кіраўнікоў эўрапейскіх дзяржаў, якія павіншавалі Лукашэнку з «перамогай на выбарах» 26 студзеня 2025 году. Ён зрабіў гэта двума днямі пазьней.
У кастрычніку 2025 году Вучыч на палях саміту Эўрапейскай палітычнай супольнасьці ў Даніі сустрэўся зь Сьвятланай Ціханоўскай. Яны абмеркавалі праграмы рэабілітацыі для беларусаў у Сэрбіі і шляхі далейшай дапамогі тым, хто быў вымушаны пакінуць краіну. Ціханоўская падзякавала сэрбскаму прэзыдэнту за «канструктыўны дыялёг і супрацу».
У Сэрбіі паўтара году не сьціхаюць антыўрадавыя пратэсты
У Сэрбіі ўжо больш за паўтара году працягваюцца антыўрадавыя пратэсты, якія ўсчаліся пасьля абвалу навесу на чыгуначным вакзале ў Нові-Садзе. Тады загінулі 16 чалавек.
Прычынай трагедыі, якая адбылася 1 лістапада 2024 году, пратэстоўцы называюць карупцыю, вынікам якой стала няякаснае будаўніцтва вакзала. Правядзеньне датэрміновых выбараў было адным з асноўных патрабаваньняў дэманстрантаў.
Форум