Як паведаміў сайт дзяржаўнай беларускай тэлевізіі news.by са спасылкай на інтэрвію міністра аховы здароўя Беларусі Аляксандра Хаджаева, улады прапануюць увесьці для лекараў новае правіла — перш, чым пачаць практыку ў прыватнай клініцы, трэба сем гадоў адпрацаваць у дзяржаўнай установе.
Акрамя таго, лекару трэба будзе мець першую катэгорыю.
Па словах міністра Аляксандра Хаджаева, праект зьменаў цяпер абмяркоўваецца з мэдыцынскай супольнасьцю, пры гэтым «крытычных заўваг» і вялікай колькасьці пытаньняў ад мэдыкаў не паступіла.
«Патрэбна будзе адпрацаваць у дзяржаўнай мэдустанове сем гадоў замест трох», — паведаміў тэлеканал Беларусь.
Канчатковую норму будуць прымаць пасьля збору водгукаў мэдыцынскай супольнасьці, заявіў Караеў.
Раней такую рэформу абмяркоўвалі на нарадзе ў Лукашэнкі, дзе прагучала ідэя абмежаваць магчымасьць пераходу лекараў зь дзяржаўных у прыватныя клінікі, а для гэтага павялічыць стаж працы з трох да сямі гадоў у дзяржаўных установах і зрабіць абавязковай наяўнасьць ня менш за першай катэгорыі, у тым ліку і для сярэдніх мэдычных супрацоўнікаў.
Чаму гэта важна
З агульнадзяржаўнай базы вакансіяў, апублікаванай на афіцыйным сайце службы занятасьці Міністэрства працы і сацыяльнай абароны Беларусі, вынікае, што ў лякарнях, санаторыях і іншых мэдычных установах краіны не хапае 3644 лекараў, 1878 мэдычных сясьцёр і 1872 санітараў. Найбольшы дэфіцыт мэдычных кадраў назіраецца ў Менску, Менскай, Горадзенскай і Берасьцейскай вобласьцях.
5 чэрвеня на адкрыцьці шпіталю ў Горадні Аляксандар Лукашэнка назваў «чужымі» лекараў, што выехалі зь Беларусі за мяжу, і заклікаў іх вярнуцца, каб «посуд мыць» і выносіць сьмецьце.
Пасьля 2020 году ў Беларусі пачаліся масавыя рэпрэсіі, якія закранулі і лекараў. Многія зь іх актыўна ўдзельнічалі ў пратэстах супраць гвалту і катаваньняў. Кіраўніцтва шпіталёў звальняла неляяльных мэдыкаў, хоць сярод іх былі прадстаўнікі ўнікальных для Беларусі спэцыялізацыяў.
Прыватны сэктар аховы здароўя ў Беларусі таксама сутыкнуўся з беспрэцэдэнтным ціскам. Паводле Міністэрства аховы здароўя ў Беларусі дзейнічаюць да 1950 аб’ектаў прыватнай формы ўласнасьці, аднак у гэты лік уваходзяць ня толькі клінікі, але і індывідуальныя прадпрымальнікі, стаматалягічныя кабінэты, кабінэты масажу, оптыкі і гэтак далей. Колькасьць паўнавартасных мэдычных цэнтраў не перавышае 550 устаноў.
У 2020 годзе прадстаўнікі сфэры аховы здароўя, у тым ліку прыватных устаноў, актыўна падтрымлівалі пратэсты.
