На сустрэчы з вайскоўцамі Ціхаакіянскага флёту, якая прайшла на Сахаліне, Пуцін назваў захоп суднаў, што належаць да так званага ценявога флёту Расеі, «разбоем і пірацтвам» і падкрэсьліў, што Расея «будзе вымушаная адказваць люстэркава», перадае ТАСС.
Прычым, паводле яго, не абавязкова ў тых акваторыях, дзе «захопліваюць судны», а «там, дзе ўжо мы самі палічым патрэбным і мэтазгодным».
Сёньня ж МЗС Расеі прыгразіла Эўразьвязу «вялікімі небясьпекамі» за тое, што той дазволіў сваёй місіі IRINI затрымліваць замежныя танкеры ў Міжземным моры. Вайсковая місія IRINI з 2020 году пільнуе, каб ніхто не парушаў эмбарга ААН на пастаўкі ў Лібію зброі.
Гаворка ідзе пра судны, якія ў Брусэлі адносяць да так званага ценявога флёту Расеі. Гэта судны пад сьцягамі трэціх краін, якія ажыцьцяўляюць перавозкі ў інтарэсах Расеі. Многія зь іх былі ўключаныя ў санкцыйныя сьпісы заходніх краін, бо самі лічацца інструмэнтам абыходу санкцыяў.
Паводле Reuters, што ад пачатку 2026 году ў Эўропе затрымалі дзевяць такіх танкераў, чатыры зь іх — у Францыі. Як правіла, на кампаніі — уладальніцы суднаў накладаюць штрафы, а самі судны адпускаюць.
Аднак у ЭЗ існуе і мэханізм канфіскацыі грузу затрыманых суднаў. Украіна, з свайго боку, заяўляе, што судны расейскага ценявога флёту могуць разглядацца як законныя вайсковыя цэлі.
Чаму гэта важна?
Расея выкарыстоўвае «ценевы флёт» танкераў зь непразрыстай структурай уласнасьці, каб абысьці міжнародныя санкцыі, накладзеныя на яе нафтавы экспарт. «Ценевы флёт» складаецца больш чым з 700 вадаплаваў і адказвае за перавозку 75% расейскай нафты ў абыход санкцыяў.
Форум