Ужо сёньня: 100 гадоў з дня нараджэньня Янкі Запрудніка, шостая гадавіна прэзыдэнцкіх выбараў — 2020

Дзень у гісторыі

9 жніўня 2020 году ў Беларусі адбыліся прэзыдэнцкія выбары. Яны прайшлі ва ўмовах масавых фальсыфікацыяў. Паводле агучаных ЦВК зьвестак, Аляксандар Лукашэнка набраў 80,1%, Сьвятлана Ціханоўская — 10,12%. На шмат якіх участках незалежныя назіральнікі фіксавалі несумненную перавагу Ціханоўскай. Ужо ўвечары 9 жніўня пачаліся масавыя пратэсты і затрыманьні. Апошнія набылі маштаб рэпрэсіяў, якіх не было ў найноўшай гісторыі Беларусі. Вынікі выбараў не прызнала міжнародная супольнасьць.

Рэпрэсіі працягваюцца дагэтуль. Паводле агучаных 6 жніўня 2026 году даных праваабарончага цэнтру «Вясна», з 2020 году сама меней 10 016 чалавек сутыкнуліся з палітычна матываваным крымінальным перасьледам, ня менш за 8670 былі асуджаныя, 37 чалавек адправілі на прымусовае псыхіятрычнае лячэньне.

Таксама ў гэты дзень

1500 ― Маскоўскія войскі ўзялі Таропец у ходзе маскоўска-літоўскай вайны (1500–1503).

1944 ― заснаваны Менскі аўтамабільны завод.

1945 ― адбылося атамнае бамбаваньне Нагасакі авіяцыяй ЗША.

1945 — СССР уступіў у вайну зь Японіяй падчас Другой сусьветнай вайны.

1965 ― Сінгапур аддзяліўся ад Малайзіі і атрымаў незалежнасць.

1974 ― Рычард Ніксан падаў у адстаўку з пасады прэзідэнта ЗША.

1942 — каля 200 габрэяў уцяклі з гета ў Мірскім замку.

1999 ― Уладзімір Пуцін прызначаны выканаўцам абавязкаў старшыні ўраду Расеі.

У гэты дзень нарадзіліся

1569 — Лаўрын Бартыліюс, дзяяч каталіцкай царквы, выкладчык у езуіцкіх навучальных установах Вільні і Нясьвіжа, аўтар аскетычных і філязофскіх твораў.

1850 — Рудальф Абіхт, нямецкі філёляг-славіст, адзін зь першых дасьледнікаў і папу­ля­ры­за­­тараў беларускай культуры ў Нямеччыне.

1890 — Максім Бурсевіч, дзеяч беларускага нацыянальнага руху ў Заходняй Беларусі, пэдагог, публіцыст.

1893 — Васіль Мачульскі, літаратуразнавец.

1902 — Панцеляймон Панамарэнка, савецкі дзяржаўны дзяяч, першы сакратар ЦК КП БССР (1938–1947).

1910 — Ларыса Геніюш, пісьменьніца, дзяячка беларускага адраджэньня, сакратар Рады БНР, зьняволеная ГУЛАГу ў 1948 — 1956 гадах.

ГЛЯДЗІЦЕ ТАКСАМА:

Супрацоўнік КДБ: «Сустрэча з Геніюш памяняла мой лёс». У Празе ўспаміналі выбітную беларускую паэтку

1926 — Янка Запруднік, адзін з самых вядомых дзеячоў беларускай дыяспары ў ЗША, гісторык, публіцыст, шматгадовы супрацоўнік Радыё Свабода, сябра Рады БНР.

ГЛЯДЗІЦЕ ТАКСАМА:

«Ягоным сэрцам была Беларусь». Някляеў, Гардзіенка, Вячорка пра Янку Запрудніка

1936 — Яўген Міклашэўскі, паэт, празаік і перакладнік.

1938 — Альбіна Сямёнава, літаратурны крытык, пісьменьніца.

1957 — Сяргей Запрудзкі, мовазнавец.

У памяці

1516 ― Геранімус Босх, мастак эпохі Паўночнага Адраджэньня XV–XVI стагодзьдзяў (у гэты дзень былі хаўтуры, дакладная дата ягонай сьмерці невядомая).

1856 — Флярыян Бохвіц, асьветнік, філёзаф-мараліст, пісьменьнік.

1943 ― памёр Хаім Суцін, францускі мастак паходжаньнем зь Беларусі.

1976 ― Іван Мележ, беларускі пісьменьнік.

2022 — Мікалай Сьлюнькоў, савецкі дзяржаўны дзяяч, першы сакратар ЦК КП Беларусі ў 1983–87.