Згодна з гэтымі зьвесткамі, амэрыканскія вайскоўцы нанесьлі ўдары «па дзясятках цэляў у розных месцах высокадакладнымі боепрыпасамі, каб аслабіць здольнасьць Ірану працягваць атакаваць міжнародную навігацыю, якая праходзіць цераз Армускую пратоку».
«Сілы CENTCOM нанесьлі ўдары па іранскіх вайсковых сыстэмах супрацьпаветранай абароны, берагавых радарных устаноўках, ракетным і бесьпілётным патэнцыяле, а таксама па малых караблях, выкарыстоўваючы амэрыканскія зьнішчальнікі, вайскова-морскія караблі, ударныя паветраныя дроны і —упершыню — аднаразовыя морскія бесьпілётнікі», — гаворыцца ў заяве.
Амэрыканскія вайскоўцы нагадваюць, што Армуская пратока служыць «жыцьцёва важным морскім калідорам для ўсясьветнага гандлю» і што «Іран яе не кантралюе».
Аднаўленьне атак і апошнія заявы бакоў зноў паставілі пад сумнеў пэрспэктыву спыненьня агню і мэмарандуму аб узаемаразуменьні, падпісанага ЗША і Іранам у сярэдзіне чэрвеня.
Абвастрэньне сытуацыі ў Пэрсыдзкай затоцы
Аднаўленьне ўзаемных удараў паміж Іранам і ЗША выклікала новы сур’ёзны крызіс пасьля падпісаньня ў мінулым месяцы 60-дзённага мэмарандуму аб узаемаразуменьні, накіраванага на спыненьне ваенных дзеяньняў і аднаўленьне аднаго з найважнейшых морскіх маршрутаў у сьвеце.
Вайскоўцы ЗША 9 ліпеня аднавілі ўдары па вайсковых аб’ектах Ірану ў адказ на абмежаваньне навігацыі ў Армускай пратоцы. Атака адбылася празь некалькі гадзін пасьля таго, як прэзыдэнт Дональд Трамп абвясьціў аб заканчэньні пагадненьня аб спыненьні агню з Тэгеранам.
На фоне канфлікту ўсясьветныя цэны нафты зноў пачалі расьці.
Рух цераз Армускую пратоку запавольваецца да мінімуму за некалькі тыдняў, бо новыя ўдары ЗША і Ірана павялічваюць рызыку для бясьпекі, піша Reuters
Колькасьць караблёў, якія праходзяць цераз пратоку, у нядзелю ўпала да мінімуму за некалькі тыдняў.
У панядзелак цэны на нафту рэзка вырасьлі пасьля таго, як ЗША пачалі сэрыю атак на Іран і пасьля таго, як Тэгеран абвясьціў аб закрыцьці Армускай пратокі.
Барэль эталённай нафты маркі Brent з пастаўкай у верасьні падаражэў на 3,75% — да 78,86 даляра.
Амэрыканская эталённая нафта West Texas Intermediate з пастаўкай у жніўні падаражэла на 3,65% — да 74,02 даляра за барэль.
Форум