Дата дня
2003 — у Менску тысячы людзей прайшлі працэсіяй на пахаваньні Васіля Быкава. Вядомага на ўвесь сьвет беларускага пісьменьніка хавалі пад нацыянальным сьцягам, адпрэчыўшы чырвона-зялёны. З гэтай прычыны кіраўнік праўладнага саюзу пісьменьнікаў Чаргінец і іншыя дзяржаўныя службоўцы адмовіліся браць удзел у пахаваньні. Пасьля гэтага ў Беларусі, бадай, не было настолькі масавай народнай жалобы і падобных разьвітальных шэсьцяў.
Падзеі дня
1447 — вялікі князь Казімер каранаваўся на караля польскага.
1794 — Паўстаньне пад кіраўніцтвам Тадэвуша Касьцюшкі: адбыўся бой з расейскімі карнымі войскамі пад мястэчкам Солы.
1840 — загадам расейскага імпэратара Мікалая I 25 чэрвеня 1840 году скасоўвалася дзеяньне Статуту Вялікага Княства Літоўскага 1588 году на тэрыторыі Віленскай, Горадзенскай і Менскай губэрняў. На тэрыторыі Віцебскай і Магілёўскай губэрняў Трэці Статут ВКЛ дзейнічаў да 1831 году. Такім чынам, на тэрыторыі Беларусі канчаткова ўвяла сваё заканадаўства Расейская імпэрыя.
1925 — у Сэйме Польшчы пасьля расколу Беларускага пасольскага клюбу заснаваны пасольскі клюб пад назвай Беларуская сялянска-работніцкая грамада.
1940 — падчас Другой усясьветнай вайны Францыя была падзеленая на нямецкую акупацыйную зону і зону калябарацыянісцкага ўраду маршала Філіпа Пэтэна з цэнтрам у горадзе Вішы.
1941 — Фінляндыя ўступіла ў Другую ўсясьветную вайну на баку нацысцкай Нямеччыны.
1943 — габрэі ў Чанстахоўскім гета паднялі паўстаньне супраць нацыстаў.
1950 — пачалася Карэйская вайна: Паўночная Карэя ўварвалася ў Паўднёвую; вайна цягнулася да 1953 году.
1992 — Беларусь усталявала дыпляматычныя дачыненьні з Расеяй.
2003 — пастановай Савету міністраў афіцыйна закрыты Беларускі гуманітарны ліцэй імя Якуба Коласа.
2020 — арыштаваны Ігар Лосік, блогер і журналіст Радыё Свабода. У сьнежні 2021 году яго асудзілі на 15 гадоў зьняволеньня. 11 верасьня 2025 году яго вызвалілі ў выніку перамоў паміж Лукашэнкам і прадстаўнікамі ЗША, але адразу па вызваленьні вывезьлі ў Літву.
У гэты дзень нарадзіліся
1852 — Антоні Гаўдзі, каталёнскі архітэктар.
1892 — Зыгмунт Абрамовіч, адзін зь вядучых актораў Першай беларускай трупы Ігната Буйніцкага.
1903 — Джордж Оруэл, ангельскі пісьменьнік.
1905 — Пятрусь Броўка, беларускі грамадзкі дзяяч, пісьменьнік, паэт і перакладчык. У 1967–1980 гадах Броўка быў галоўным рэдактарам Беларускай савецкай энцыкляпэдыі, пераемніцай якое стала Беларуская энцыкляпэдыя.
1939 — Варлен Бечык, літаратуразнавец.
У памяці
1943 — Артур Гольдштайн, нямецкі журналіст габрэйскага паходжаньня, забіты ў нацысцкім канцлягеры Аўшвіц.
1974 — Янка Раманоўскі, беларускі мастак, пляменьнік Янкі Купалы.
2009 — Майкл Джэксан, амэрыканскі сьпявак і танцор.
2011 — Раман Тармола-Мірскі, беларускі паэт.
2022 — Барыс Тасман, вядомы спартовы журналіст.
2022 — Эрнэст Ялугін, пісьменьнік і журналіст.
2022 — Аляўціна Вячорка, літаратурны рэдактар, перакладчыца, грамадзкая дзяячка.