Як паведаміла дзяржаўнае агенцтва БелТА, Лукашэнка прызнаўся, што чакаў сустрэчы з Лаўровым, каб абмяняцца думкамі «па ўсім спэктры міжнароднай абстаноўкі».
«Не таму, што мы глябальная краіна, як Расея ці Кітай, і будзем удзельнічаць у разьвязаньні нейкіх праблем, але, тым ня менш, хацелася б ведаць, у якім кірунку дзейнічаць і разгортваць нашу зьнешнюю палітыку. І вы, як чалавек дасьведчаны, мне параіць можаце сёе-тое», — сказаў Лукашэнка.
Калі Лаўроў заўважыў, што Лукашэнка яму лісьлівіць, той адказаў: «Не, што вы. У вас, сыходзячы з таго маштабу, які займае Расея ў міжнародным становічшы... Таму я чакаю больш такой канкрэтнай і шырокай інфармацыі, як у нас звычайна бывае — мы ніколі не прыхоўвалі адзін ад аднаго нічога за доўгія гады нашай супрацы».
Лукашэнка прапанаваў Лаўрову абмеркаваць сытуацыю ў АДКБ, ЭАЭС, СНД і ШАС, а таксама згадаў аб саміце G7, які пачынаецца 15 чэрвеня ў Францыі.
«Усе вялікія сабраліся. Таму нам, хочаш, ня хочаш, трэба зьвяртаць на гэта ўвагу», — дадаў ён.
«Зараз апавядзем пра тое, якія ў нас ёсьць думкі. І я, вядома ж, буду гатовы выказаць нашыя ацэнкі апошніх падзей, у тым ліку, у сувязі з падрыхтоўкай да гэтай „сямёркі“ ў сувязі з ініцыятывай Брытаніі, Францыі, Нямеччыны — яны там ультыматум выставілі зь пяці пункта. Паслы прыходзілі, уручылі нам свае пажаданьні. Агулам, ёсьць, пра што пагаварыць, і што наўпрост датычыць саюзнай дзяржавы», — сказаў расейскі міністар.
На сустрэчы таксама праанасавалі новую сустрэчу Лукашэнкі з Пуціным.
«Неўзабаве, мы дамовіліся, што сустрэнемся і абмяркуем тыя праблемныя пытаньні, якія, магчыма, нас датычаць. Дамоўленасьць у нас адна: калі ўпады нешта не вырашаюць, то гэта застаецца на ўвазе двух прэзыдэнта. Мы гэтым шляхам ідзем», — сказаў Лукашэнка.
Чаму гэта важна
Пасьля 2020 году і падтрыманьня Беларусьсю расейскага поўнамаштабнага ўварваньня ва Ўкраіну Беларусь усё больш інтэгруецца з Расеяй.
Улады Беларусі і Расеі дамовіліся ўзгадняць замежную палітыку, дзейнасьць сілавых структур у пытаньнях супольнага крымінальнага вышуку грамадзян, стварылі адзіную абаронную прастору і ўхвалілі супольную вайсковую дактрыну.
Адначасова адбываецца ўніфікацыя падатковага і мытнага заканадаўства, макраэканамічнай палітыкі. Нядаўна бакі заявілі і аб уніфікацыі правасудзьдзя.
Форум