«Разьлічваю на давяральны дыялёг»
У віншаваньні лідэра Кітаю Аляксандар Лукашэнка адзначыў, што Кітай, які мадэрнізуецца і працьвітае, стварае найвышэйшыя стандарты «глябальнага лідэрства».
«У многім гэта зьяўляецца вынікам вашага дальнабачнага кіраўніцтва, пасьлядоўнай палітыкі ўмацаваньня дзяржаўнасьці і ўстойлівага сацыяльна-эканамічнага прагрэсу краіны. Цяжка таксама пераацаніць ваш унёсак у пашырэньне міжнароднага супрацоўніцтва і забесьпячэньне стабільнасьці ў сьвеце», — гаворыцца ў віншаваньні.
Лукашэнка адзначыў «беспрэцэдэнтна высокі ўзровень» беларуска-кітайскіх дачыненьняў і «зь цеплынёй» згадаў супольныя леташнія «зьмястоўныя гутаркі».
«Разьлічваю на працяг давяральнага дыялёгу і зь нецярплівасьцю чакаю сустрэчы, якая мае адбыцца і без сумневаў надасьць чарговы імпульс двухбаковаму ўзаемадзеяньню Менску і Пэкіну», — адзначыў Лукашэнка і пажадаў Сі Цзіньпіну добрага здароўя і новых дасягненьняў на карысьць дружалюбнага кітайскага народу.
Што пажадаў Трампу — невядома
У паведамленьні аб віншаваньні Сі Цзіньпіна было пяць абзацаў, а пра віншаваньне Дональду Трампу — усяго два радкі, якія можна расцаніць як інфармацыю не пра віншаваньне, а пра ўзрост амэрыканскага прэзыдэнта.
«Прэзыдэнту ЗША Дональду Трампу спаўняецца 80 гадоў», — паведаміла прэсавая служба і дадала, што Лукашэнка «павіншаваў амэрыканскага калегу зь юбілеем». Тэкст віншаваньня не апублікавалі.
На сайце Лукашэнкі няма навінаў аб ранейшых віншаваньнях цяперашняму прэзыдэнту ЗША з нагоды дня ягонага нараджэньня. У той жа час Лукашэнка даволі разгорнута віншаваў Дональда Трампа зь перамогамі на выбарах і зычыў яму «трапных палітычных рашэньняў».
У сваіх публічных выказваньнях Лукашэнка называў сябе «трампістам» і дазваляў сабе крытыкаваць палітыку амэрыканскага прэзыдэнта.
Адметна, што ў верасьні 2024 году сам Дональд Трамп парушыў дыпляматычны пратакол і праз свайго спэцыяльнага прадстаўніка перадаў Лукашэнку афіцыйны ліст зь віншаваньнем да дня нараджэньня і падарунак — запінкі з выявай Белага дому.
На сайтах Белага дому і Дзяржаўнага дэпартамэнту ЗША інфармацыю аб віншаваньнях замежных лідэраў не публікуюць.
У 2019 годзе Аляксандар Лукашэнка на сустрэчы з дарадцам прэзыдэнта ЗША ў нацыянальнай бясьпецы Джонам Болтанам папрасіў яго перадаць падарункі для амэрыканскай прэзыдэнцкай пары: Дональду Трампу — кордзік, Мэланіі Трамп — абрус з сурвэткамі.
Форум