Аўтар выданьня Dziennik. Gazeta Prawna падкрэсьлівае, што Мілінкевіч, які быў адным з сымбаляў беларускай апазыцыі ў 2006 годзе і кандыдатам на прэзыдэнта, сёньня апынуўся ў складанай жыцьцёвай сытуацыі ў Польшчы.
Летась 25 лістапада Аляксандру Мілінкевічу зрабілі складаную апэрацыю. Яму выдалілі тромб. Пасьля гэтага ўзьніклі ўскладненьні. Зараз палітык мае патрэбу ў далейшай рэабілітацыі. Нядаўна жонка Мілінкевіча Іна Кулей абвясьціла пра збор сродкаў на рэабілітацыі. У інтэрнэце патрэбную суму сабралі 120 тысяч злотых (каля 33 тысяч даляраў ЗША) за два дні.
«Мілінкевіч належаў да тых прадстаўнікоў дэмакратычных сілаў, якія арыентаваліся на Польшчу трошкі больш, чым шматвэктарная апазыцыя 2010 года, і без параўнаньня выразна больш, чым яе наступнікі ў 2020 годзе. Для інтэлігенцыі савецкай Горадні ПНР і яе дзяржаўныя мэдыя былі акном у сьвет. Натхненьне ж яна знаходзіла ў „Салідарнасьці“ 1980-х гадоў. Агульны кандыдат апазыцыі 2006 года быў саюзьнікам нашай усходняй палітыкі, якая прадугледжвала падтрымку дэмакратычных рухаў і адцягваньне ўсходнеэўрапейскіх дзяржаў ад Расеі». — піша Патоцкі.
У артыкуле адзначаецца, што Мілінкевіч пасьля перасьледу з боку беларускіх уладаў быў вымушаны пакінуць краіну, а яго маёмасьць і дом у Беларусі фактычна страчаныя. Аўтар нагадвае, што сям’я зьбірае сродкі на рэабілітацыю і паўсядзённыя выдаткі праз дабрачынныя плятформы.
«Постаці такога ўзроўню можна пералічыць на пальцах адной рукі. Польская дзяржава можа дазволіць сабе, каб яны не мусілі турбавацца пра сваё існаваньне ў старасьці (...) Польская дзяржава не павінна пра іх забыць. У выпадку Аляксандра Мілінкевіча, на шчасьце, пакуль ня позна». — лічыць Міхал Патоцкі.
Форум