Асобным сымбалічным момантам стала тое, што, паводле ўдзельнікаў, бадай упершыню на Патрыяршай Літургіі гучала беларуская мова, што набыло асаблівае значэньне для беларускай супольнасьці ў выгнаньні.
Пасьля набажэнства Кучынскі перадаў патрыярху ліст ад беларускай дэмакратычнай лідаркі.
У сваім пасланьні Ціханоўская падзякавала Варфаламею за благаслаўленьне на стварэньне беларускага праваслаўнага прыходу ў Вільні і за падтрымку праваслаўных беларусаў, якія апынуліся за межамі радзімы.
«Ад імя беларусаў у Літве хачу выказаць глыбокую ўдзячнасьць за Ваш клопат пра беларускую праваслаўную супольнасьць, за падтрымку прыходу ў Вільні і за пастырскую апеку, якую Ўсяленскі патрыярхат аказвае беларусам у розных краінах сьвету», – гаворыцца ў лісьце.
Ціханоўская адзначыла, што пасьля падзеяў апошніх гадоў сотні тысяч беларусаў былі вымушаныя пакінуць краіну і цяпер шукаюць ня толькі бясьпеку, але і духоўную падтрымку. На яе думку, асаблівае значэньне для беларускай дыяспары мае магчымасьць атрымліваць духоўную апеку ад Канстантынопальскага патрыярхату.
У лісьце таксама згадваецца гістарычная сувязь беларускіх земляў з Усяленскім патрыярхатам, якая сягае часоў Кіеўскай мэтраполіі ВКЛ, калі праваслаўнае жыцьцё на тэрыторыі Беларусі разьвівалася ў еднасьці з канстантынопальскай традыцыяй.
На памяць пра сустрэчу Кучынскі перадаў патрыярху Слуцкі пояс – адзін з найбольш вядомых гістарычных і культурных сымбаляў Беларусі.
Варфаламей І — гэта духоўны лідар Канстанцінопальскай праваслаўнай царквы і першы па гонары сярод праваслаўных патрыярхаў у сьвеце. Ён займае пасаду Усяленскага патрыярха з 1991 года і рэзідэнцыю мае ў Стамбуле (Фанары). У праваслаўнай традыцыі Канстанцінопальскі патрыярх не кіруе ўсімі цэрквамі непасрэдна, але мае асаблівы гістарычны і сымбалічны аўтарытэт як «першы сярод роўных» сярод праваслаўных герархаў.
Форум