Абмежаваньні на продаж паліва дайшлі да Масквы і Санкт-Пецярбургу

У Маскве і Маскоўскай вобласьці абмежаваньні на продаж паліва былі ўведзеныя на запраўках ОРТК, «Лукойла» і «Газпрома», піша MSK1.ru.

• На АЗС сеткі ОРТК з 30 траўня прадаюць ня больш за 60 літраў бэнзіну або 100 літраў дызэлю аднаму пакупніку.
• На запраўках «Лукойла» — да 100 літраў бэнзіну.
• У «Газпрома» абмежаваньні складаюць «100–150 літраў» на бэнзін і дызэль.

2 чэрвеня «Фонтанка» паведаміла пра «часовыя цяжкасьці» з пастаўкамі паліва ў Санкт-Пецярбург. Праз гэта некаторыя запраўкі ў горадзе ўвялі ліміт на продаж бэнзіну — ад 50 да 95 літраў.

Абмежаваньні на продаж паліва таксама ўведзеныя ў Белгародзкай і Курскай вобласьцях, так званай «ЛНР» і анэксаваным Крыме.

Паводле зьвестак крыніцы «Коммерсанта» на паліўным рынку, «калі сытуацыя ня выправіцца», то да пачатку жніўня падобныя праблемы «пашырацца на большую колькасьць рэгіёнаў».

ГЛЯДЗІЦЕ ТАКСАМА:

Пасьля ўкраінскіх удараў па расейскіх НПЗ аб’ём продажаў беларускага бэнзіну на Пецярбурскай біржы вырас у 26 разоў

Чаму гэта важна

Хоць закупкамі зь Беларусі немагчыма закрыць дэфіцыт паліва, які ўтварыўся ў Расеі пасьля ўкраінскіх атак на НПЗ, пра што сьведчаць і расейскія аналітыкі, але беларускія пастаўкі могуць зьмякчыць дэфіцыт, даўшы расейскім заводам час на рамонт. У цяперашняй сытуацыі пры дэфіцыце бэнзіну расейскія рэгіёны зьвяртаюць увагу на Беларусь.

Сумарны аб’ём продажаў бэнзіну зь беларускіх НПЗ на расейскай Пецярбурскай біржы вырас у 26 разоў у параўнаньні зь леташнім траўнем.

Улады Беларусі з 2022 году падтрымліваюць Расею ў яе вайне супраць Украіны, у тым ліку надаючы расейскаму войску сваю тэрыторыю, памежныя пераходы, тылавую інфраструктуру, а таксама прадукцыю свайго ВПК.

ГЛЯДЗІЦЕ ТАКСАМА:

З-за ўдараў Украіны па НПЗ у 2 абласьцях Расеі і на акупаванай Луганшчыне абмежавалі продаж бэнзіну