Як адзначаецца ў апублікаванай на Нацыянальным праўным інтэрнэт-партале Беларусі пастанове, праект ухвалілі на падставе прапановы камісіі міжнароднай тэхнічнай супрацы пры Савеце міністраў Беларусі.
У Беларусі каардынатарам праекту прызначылі Міністэрства надзвычайных сытуацыяў. Аб’ём фінансаваньня ў пастанове не ўдакладнілі.
Што прадугледжвае праект
Праект МАГАТЭ «Удасканаленьне мэтадаў бясьпечнага абыхожданьня з аб’ектамі ядзернай спадчыны» стартуе сёлета. Дэпартамэнт ядзернай і радыяцыйнай бясьпекі МНС Беларусі ў красавіку анансаваў праект, які плянуюць рэалізаваць на тэрыторыі Палескага радыяцыйна-экалягічнага запаведніку. У яго межах, апроч павелічэньня кампэтэнцыі адмыслоўцаў у галіне радыяцыйнай бясьпекі, плянуюць паставіць вымяральнае абсталяваньне для ацэнкі радыяактыўнага забруджаньня навакольля і радыяцыйнага кантролю.
Чаму гэта важна
Пасьля жорсткага разгону акцыяў пратэсту, выкліканых фальсыфікацыяй вынікаў прэзыдэнцкіх выбараў у 2020 годзе, міжнародныя арганізацыі спынілі ўсю фінансавую і тэхнічную дапамогу Беларусі.
У 2022 годзе, калі ўлады Беларусі падтрымалі расейскае ваеннае ўварваньне супраць Украіны, санкцыі сталі яшчэ больш жорсткімі — краіна страціла яшчэ і магчымасьці набываць за мяжой высокія тэхналёгіі і высакаякаснае абсталяваньне.
Як вынікае з публічных дакумэнтаў, структуры ААН аднавілі тэхнічную дапамогу Беларусі не пазьней 2024 году.
У сакавіку 2026 году стала вядома аб вылучэньні Кітаем фінансавай дапамогі для стварэньня міжраённага цэнтру спэцыялізаванай і высокатэхналягічнай мэдычнай дапамогі на базе Мазырскай цэнтральнай гарадзкой паліклінікі ў рамках Праграмы разьвіцьця ААН.
У сакавіку 2025 году анансавалі аднаўленьне дапамогі Глябальнага фонду прафіляктыцы і лячэньню ВІЧ і сухотаў, якую былі спынілі ў 2007 годзе.
У сьнежні 2024 году ўлады Беларусі паведамілі аб атрыманьні тэхнічнай дапамогі Міжнароднай арганізацыі міграцыі (IOM) на ўмацаваньне патэнцыялу Дзяржаўнага памежнага камітэту «ў сувязі з магчымым ростам колькасьці выпадкаў прыбыцьця мігрантаў на мяжу».
У траўні 2024 году стала вядома аб рэалізацыі пры ўдзеле МАГАТЭ двух праектаў — «Удасканаленьне нацыянальнай інфраструктуры радыяцыйнага маніторынгу і сыстэмы аварыйнага рэагаваньня» і «Ўмацаваньне інфраструктуры рэгуляваньня ў галіне ядзернай і радыяцыйнай бясьпекі на пачатковым этапе эксплюатацыі атамнай электрастанцыі».
Форум