Былога намесьніка старшыні «Маладога Фронту» Яўгена Скочку, які даўно адышоў ад палітыкі, цяпер асудзілі на тры гады зьняволеньня.
Паводле зьвестак «Вясны», Яўгена Скочку абвінавацілі ў «садзейнічаньні экстрэмісцкай дзейнасьці» (арт. 361‑4 Крымінальнага кодэксу), у «паклёпе» і «абразе Лукашэнкі» (арт. 367 і 368 КК), а таксама ў «дыскрэдытацыі Рэспублікі Беларусь» (арт. 369-1 КК).
З падрабязнасьцяў справы Яўгена Скочкі вядома хіба тое, што ў камэнтары ў сацыяльных сетках ён ужыў слова «калхазан» і аспрэчыў тое, што «Беларусь — прававая краіна». Пасьля суду, які адбыўся ў пачатку лютага, беларускія праваабаронцы прызналі Скочку палітвязьнем.
Дасьведчаная ў справах Яўгена Скочкі крыніца расказала пра ўмовы ягонага ўтрыманьня і настрой палітвязьня.
«За паўгоду СІЗА яму тройчы мянялі камэру, цяпер сядзіць у невялікай, на 10 чалавек. Казаў, што ягонае месца на верхнім ярусе і што там усе, хто наверсе, з жоўтымі біркамі, то бок палітычныя. Збольшага на ўмовы ня скардзіўся, настрой у яго нармальны. Наракае толькі на турэмнае харчаваньне, бо на некаторыя стравы ў яго алергія», — расказала крыніца.
Вярхоўны суд Беларусі ў красавіку пацьвердзіў прысуд Яўгену Скочку. Гэта азначае, што неўзабаве з гомельскага СІЗА палітвязьня перавядуць у калёнію, але ў якую, пакуль не паведамілі.
Паводле крыніцы, галоўная праблема для Яўгена — тое, што ягоны стан можа пагоршыцца праз больш складаныя ўмовы ў калёніі.
«У яго павышаны ціск, паводле рэцэпту перадаюць адмысловыя лекі, і ён іх атрымлівае, гэта дакладна. Яшчэ ў яго нестабільнасьць шыйных хрыбетак, праз што таксама патрэбныя пэўныя мэдычныя захады — яму трэба насіць адмысловы „каўнер“. У СІЗА гэта ўсё робіцца, але як будзе ў калёніі, невядома. І зрок пагоршыўся. Шмат чытае, між тым асьвятленьня там недастаткова. Усё гэта разумее, але пры гэтым прасіў за яго асабліва не перажываць, казаў, што ўсё вытрывае, да ўсяго падрыхтаваны», — апавяла крыніца аб праблемах Яўгена Скочкі са здароўем.
Чым вядомы Яўген Скочка
У канцы 90-х цягам некалькіх гадоў Яўгена Скочку выбіралі намесьнікам старшыні «Маладога Фронту» — моладзевай грамадзкай арганізацыі, якая была ў эпіцэнтры барацьбы з дыктатурай Лукашэнкі і змагалася за захаваньне незалежнасьці Беларусі.
Тагачасны старшыня «Маладога Фронту» Павал Севярынец назваў Яўгена Скочку «вельмі харызматычным і крэатыўным палітыкам, зь якім заўсёды было цікава працаваць побач».
«Гэта разам зь ім на дзень Сьвятога Валянціна мы ладзілі шэсьці да эўрапейскіх амбасадаў, ён асабіста прыдумляў і праводзіў пэрформансы, пра якія нават расейская тэлевізія згадвала ў вечаровых навінах. Вельмі крэатыўны, харызматычны. За адзін выпадак, калі незаплянавана ўзарваўся пачак фаервэркаў, на яго завялі крымінальную справу і асудзілі на год умоўна. Ён зьехаў у Гомель, адкуль плянаваў вярнуцца ў Менск, але сустрэў там сваю палавінку, завёў сям’ю, пайшлі дзеці і ён там застаўся», — расказаў пра Яўгена Скочку Павал Севярынец.
Палітык ня ўзяўся вызначыць, чаму праз больш як 20 гадоў улады Беларусі згадалі пра былога маладафронтаўца і вырашылі пакараць яго пазбаўленьнем волі.
«Калі ў 2000 годзе першы раз Скочку судзілі за тыя фаервэркі, яшчэ бывала, што справы развальваліся празь недахоп доказаў. Цяпер такое немагчыма. Знойдуць непажаданы допіс у тэлефоне — і гэтага хопіць, каб кожнага адправіць за краты, а ня тое што вядомага апазыцыянэра», — мяркуе Павал Севярынец.
У кастрычніку 2026 Яўгену Скочку споўніцца 50 гадоў. Да арышту ён жыў зь сям’ёй ў Гомлі, займаўся прадпрымальніцтвам. У яго трое дзяцей.
Форум